BAKI, AzerVoice

Qəzza zolağında HƏMAS hərəkatının rəhbəri Xəlil əl-Heyyənin başçılıq etdiyi HƏMAS-ın danışıqlar heyəti bazar günü Qahirədə Misirli rəsmilərlə, həmçinin Qətərli rəsmilərin iştirakı ilə bir neçə görüş keçirib.

Danışıqların məqsədi vasitəçi ölkələr olan Misir və Qətərin təşəbbüsü ilə HƏMAS və İsrail arasında fikir ayrılıqlarını aradan qaldırmaq və atəşkəsi təmin etməkdir.

HƏMAS-ın siyasi bürosunun rəhbərinin media müşaviri Tahir ən-Nunu "Biz, müharibənin dayandırılması, İsrailin Qəzza zolağından çıxması və humanitar yardımların daxil olması qarşılığında israilli bütün girovları ciddi mübadilə razılaşması çərçivəsində azad etməyə hazırıq."-deyə bildirib.

Ən-Nunu İsraili razılaşmanı pozmaqda ittiham edib və deyib ki, : “Problem girovların sayında deyil, problem ondadır ki, işğalçı tərəf öhdəliklərindən yayınır, atəşkəs razılaşmasının icrasını əngəlləyir və müharibəni davam etdirir.”

O, əlavə edib ki, HƏMAS vasitəçilərə İsrailin razılaşmanı yerinə yetirməsinə zəmanət verilməsinin vacibliyini açıq şəkildə çatdırıb. Əlavə edib ki, “HƏMAS danışıqlarda atəşkəs və girovların mübadiləsi ilə bağlı təqdim olunan fikirlərə çox müsbət və çevik yanaşıb.”

Qeyd edək ki, İsrail 2023-cü il oktyabrın 7-də HƏMAS-ın İsrailə qarşı görünməmiş hücumundan sonra Qəzza zolağında genişmiqyaslı müharibəyə başladı. Fələstin Səhiyyə Nazirliyi isə bazar günü səhərədək, yəni martın 18-dən bəri İsrailin hava zərbələri və hərbi əməliyyatlarının bərpasından sonra Qəzzada azı 1574 fələstinlinin öldüyünü açıqlayıb. Beləliklə, müharibə başlayandan bəri Qəzzada öldürülən fələstinlilərin ümumi sayı 50 944 nəfərə çatıb.