BAKI,VOA

Əbu-Dabidə yerləşən beynəlxalq enerji şirkəti “Mubadala Energy” 2025-ci il üzrə dayanıqlılıq hesabatını açıqlayıb.

Bu barədə BƏƏ-nin rəsmi xəbər agentliyi WAM məlumat yayıb. Hesabata əsasən, şirkət idarə etdiyi aktivlər üzrə 1-ci və 2-ci əhatə dairəsinə daxil olan istixana qazı emissiyalarını 30,9 faiz azaldıb. Orta emissiya intensivliyi 12,4 faiz, məşəl qazının intensivliyi isə 33,9 faiz azalıb.

Şirkətin məlumatına görə, son 10 il ərzində icma proqramlarına 2,3 milyon BƏƏ dirhəmindən çox vəsait yatırılıb və bu təşəbbüslərdən 1 milyondan çox insan faydalanıb.

“Mubadala Energy” fəaliyyətə başladığı gündən etibarən işçilər arasında ölüm hallarının qeydə alınmadığını bildirib. Şirkətdə çalışanların hər biri üçün orta hesabla 8,95 təlim günü təşkil edilib.

Hesabatda müxtəlifliyin artırılması istiqamətində də irəliləyiş qeyd olunub. Hazırda şirkətin əməkdaşları arasında 38 millətin nümayəndəsi var, qadınların işçi qüvvəsində payı isə 32 faizə yüksəlib. Orta menecment səviyyəsində qadınların təmsilçiliyi 18 faizdən 28 faizə çatıb.

Şirkət həmçinin ESG idarəetməsini gücləndirdiyini və IFRS S1 və S2 standartlarına uyğunluğun qiymətləndirilməsi istiqamətində işləri davam etdirdiyini açıqlayıb. “Mubadala Energy” yeddinci il ardıcıl olaraq məlumat sızması hallarının qeydə alınmadığını bildirib.