BAKI,VOA,Vüsalə Əzimzadə
Birləşmiş Ərəb Əmirlikləri (BƏƏ) daşqın və torpaq sürüşmələrindən zərər çəkən Nepal sakinləri üçün 45 ton humanitar yardım daşıyan ikinci təyyarəni göndərib.
Bu barədə BƏƏ-nin rəsmi xəbər agentliyi WAM məlumat yayıb.
BƏƏ Yardım Agentliyi vasitəsilə göndərilən yardım ərzaq məhsulları, humanitar ləvazimatlar, elektrik generatorları və digər zəruri vasitələrdən ibarətdir.
Yardım BƏƏ Prezidenti Məhəmməd bin Zayed Al Nəhyanın göstərişi ilə ayrılan 10 milyon dollarlıq vəsait çərçivəsində həyata keçirilir. Vəsait Nepalda təbii fəlakətlərdən zərər çəkən əhaliyə təcili dəstəyin göstərilməsinə yönəldilib.
BƏƏ avqust ayında Nepal üçün ilk yardım təyyarəsini də göndərmişdi. Ölkə bu təşəbbüslə fəlakətdən zərər çəkən icmalara dəstəyini davam etdirir.
