BAKI,VOA

Türkmənistan və Azərbaycan arasında konsulluq məsələləri üzrə məsləhətləşmələr keçirilib.

Bu barədə Türkmənistan Xarici İşlər Nazirliyi məlumat yayıb. Görüş sentyabrın 2-də Aşqabadda iki ölkənin xarici işlər nazirliklərinin konsulluq xidmətləri rəhbərləri səviyyəsində baş tutub.

Tərəflər ikitərəfli konsulluq əməkdaşlığının aktual məsələlərini, iki ölkə vətəndaşlarının hüquq və qanuni maraqlarının müdafiəsini, həmçinin miqrasiya, hüquq və hüquq-mühafizə sahələrində əməkdaşlığı müzakirə ediblər.

Görüşdə ikili vətəndaşlıq hallarının qarşısının alınması, Azərbaycanda ali təhsil müəssisələrində təhsil alan Türkmənistan vətəndaşlarının vəziyyəti və iki ölkənin aidiyyəti qurumları arasında qarşılıqlı fəaliyyətin təkmilləşdirilməsi məsələlərinə xüsusi diqqət yetirilib.

Tərəflər həmçinin Türkmənistan və Azərbaycanın miqrasiya xidmətləri arasında əməkdaşlığın inkişafı və təcrübə mübadiləsinin perspektivlərini nəzərdən keçiriblər.

Görüşün yekununda konsulluq məsləhətləşmələrinin əsas nəticələrini və konsulluq əməkdaşlığının gələcək inkişafı üzrə əldə olunmuş razılaşmaları əks etdirən protokol imzalanıb.