BAKI, AzerVoice
Türkiyə Prezidenti Rəcəb Tayyib Ərdoğanın sədrliyi ilə keçirilən Milli Təhlükəsizlik Şurasının (MTŞ) iclasında ölkə və region gündəmini əhatə edən bir sıra önəmli məsələlər müzakirə olunub.
AzerVoice-un məlumatına görə, iclasda ilk olaraq, PKK, YPG, FETÖ və İŞİD terror təşkilatları başda olmaqla, Türkiyənin milli birliyi və ərazi bütövlüyünü hədəf alan bütün təhdidlərə qarşı həm ölkə daxilində, həm də xaricdə həyata keçirilən mübarizə tədbirləri barədə Şura üzvlərinə ətraflı məlumat verilib. Bu çərçivədə, terrora qarşı iradənin dəyişməz olduğu və əməliyyatların qətiyyətlə davam etdiyi vurğulanıb.
İclasda həmçinin, “Terrorsuz Türkiyə” hədəfinə doğru atılan addımlar dəyərləndirilib, bu istiqamətdə əldə edilən irəliləyişlər və gələcəyə dair strategiyalar müzakirə olunub. Bildirilib ki, terrorun kökündən təmizlənməsi ilə birlikdə, xalq arasında qardaşlıq bağları daha da möhkəmlənəcək və ölkənin milli hədəflərinə doğru daha sürətli irəliləyiş mümkün olacaq.
İclasda FETÖ terror təşkilatına qarşı mübarizədə əldə olunan nəticələr və qarşıdakı mərhələdə atılacaq addımlar da nəzərdən keçirilib.
Gündəmdə Suriya məsələsi də yer alıb. Regiondakı proseslərin təsirləri də nəzərə alınaraq, Suriya ilə bağlı son inkişaflar ətraflı təhlil olunub. Türkiyə, Suriya hökumətinin ölkədə birliyi, sabitliyi və ərazi bütövlüyünü təmin etmək üçün atdığı addımları dəstəklədiyini bir daha bəyan edib. Eyni zamanda, ölkənin yenidən zorakılıq və xaosa sürüklənməsinə yönəlmiş istənilən işğal və bölücü fəaliyyətlərin qarşısının alınmasının prioritet məsələ olduğu xüsusi olaraq vurğulanıb.
İclasda İsrailin İrana hücumu ilə başlayan regional gərginlik də qiymətləndirilib. Qeyd olunub ki, onsuz da həssas durumda olan Yaxın Şərqdə yeni qarşıdurmalara və münaqişələrə yol verilməməlidir. İsrailin beynəlxalq hüququ pozaraq Fələstin, Suriya, Yəmən və İranı hədəf alması, eyni zamanda Qəzzada davam edən soyqırım və insanlıq əleyhinə cinayətlərin bölgəni fəlakətə sürüklədiyi vurğulanıb.
Son olaraq Türkiyənin Rusiya–Ukrayna müharibəsində davamlı sülhün təmin olunması üçün üzərinə düşən məsuliyyəti yerinə yetirməyə və hər cür töhfə verməyə hazır olduğu bir daha diqqətə çatdırılıb.
Qeyd edək ki, Milli Təhlükəsizlik Şurasının əvvəlki iclası mayın 22-də baş tutmuşdu.