BAKI,VOA,Yusif Şərifzadə

Fransa parlamentinin razılaşdırma komitəsi 15 yaşdan aşağı şəxslərin sosial şəbəkələrə girişini məhdudlaşdıran qanun layihəsini təsdiqləyib. Təşəbbüs uşaqların rəqəmsal təhlükəsizliyinin artırılması məqsədi daşıyır.

VOA xəbər verir ki, Fransa parlamentinin komitəsi bazar ertəsi sosial media platformalarına 15 yaşdan aşağı istifadəçilərin girişini qadağan edən qanun layihəsi üzrə razılığa gəlib. Prezident Emmanuel Makron bu qadağanın sentyabrın əvvəlində yeni tədris ili başlayana qədər qüvvəyə minməsini istədiyini bildirib.

Yeni qanun qəbul ediləcəyi təqdirdə Fransa Avstraliyadan sonra uşaqların sosial media istifadəsinə yaş məhdudiyyəti tətbiq edən ölkələrdən biri olacaq. Avstraliya 16 yaşdan aşağı şəxslər üçün bəzi sosial media platformalarına giriş qadağasını tətbiq edib.

Makron bu təşəbbüsə Avropa İttifaqı daxilində də dəstək toplamağa çalışır. Avropa Komissiyasının rəhbəri Ursula fon der Lyayen də uşaqların sosial şəbəkələrə çıxışının məhdudlaşdırılması ideyasını dəstəklədiyini bildirib.

Razılaşdırılmış qanun layihəsi əvvəlcə parlamentin aşağı palatasında, daha sonra isə Senatda müzakirəyə çıxarılacaq.

Qanun qüvvəyə minərsə, Fransanın informasiya texnologiyaları naziri 15 yaşdan aşağı uşaqlar üçün qadağan ediləcək sosial şəbəkələrin siyahısını müəyyənləşdirəcək. Platformalar isə istifadəçilərin yaşını yoxlamaq üçün Fransa məxfilik tənzimləyicisi tərəfindən təsdiqlənmiş sistemlər tətbiq etməli olacaq.

Layihədə, həmçinin orta məktəblərdə smartfon istifadəsinin qadağan edilməsi nəzərdə tutulur.