BAKI,VOA,Yusif Şərifzadə
İranın Fars vilayətinin rəsmisi ABŞ tərəfindən Şiraz şəhərinə hava zərbəsi endirildiyini açıqlayıb. Bildirilib ki, hücum nəticəsində itki qeydə alınmayıb və vəziyyət nəzarət altındadır.
VOA xəbər verir ki, İranın dövlət yayımçısı İRİB-in məlumatına görə, Fars vilayətinin qubernator müavini ABŞ qüvvələrinin Şiraz şəhərinin ərazilərindən birinə hava zərbəsi endirdiyini bildirib.
Rəsmi açıqlamada hücum nəticəsində ölən və yaralanan olmadığı qeyd edilib. Bildirilib ki, hadisədən sonra vəziyyət nəzarətə götürülüb və aidiyyəti qurumlar tərəfindən zəruri tədbirlər görülüb.
Şiraz İranın cənubunda yerləşən mühüm şəhərlərdən biridir və Fars vilayətinin inzibati mərkəzi hesab olunur. Şəhər həm tarixi, həm də iqtisadi baxımdan ölkənin əhəmiyyətli bölgələrindən biridir.
ABŞ tərəfi Şiraz şəhərinə zərbə endirilməsi ilə bağlı hələlik rəsmi açıqlama verməyib. Bölgədə ABŞ və İran arasında qarşılıqlı hücumlar fonunda hərbi gərginlik davam edir.