BAKI,VOA,Yusif Şərifzadə

ABŞ məhkəməsi Paramount Skydance şirkətinin Warner Bros. Discovery-ni 110 milyard dollara almaq planının müvəqqəti dayandırılması barədə qərar qəbul edib. Qərar bir sıra ştatların birləşmənin rəqabətə ciddi zərər vuracağı barədə müraciətindən sonra verilib.

VOA xəbər verir ki, ABŞ-ın Kaliforniya ştatının rəhbərlik etdiyi koalisiya məhkəməyə müraciət edərək sövdələşmənin bazardakı rəqabəti geri dönməz şəkildə zəiflədəcəyini iddia edib. Oklenddə yerləşən federal məhkəmənin hakimi Araseli Martinez-Olqin ştatların mövqeyində kifayət qədər əsasların olduğunu bildirib.

Məhkəmə qərarı ilə Paramount Skydance-in Warner Bros. Discovery-ni almaq prosesi avqustun 3-dək dayandırılıb. Həmin tarixdə məhkəmədə sövdələşmənin davam edən məhkəmə prosesi müddətində daha uzun müddətə təxirə salınıb-saxlanılmayacağı müzakirə ediləcək.

Nyu-Yorkun baş prokuroru Letisiya Ceyms qərarı rəqabətin qorunması baxımından mühüm addım adlandırıb. O bildirib ki, birləşmənin əleyhinə mübarizə davam etdiriləcək.

Şirkət nümayəndələri məhkəmə qərarı ilə bağlı dərhal açıqlama verməyiblər. Paramount isə daha əvvəl məhkəmə iddiasının antinhisar qanunlarını yanlış şərh etdiyini və sövdələşmənin gecikdirilməsinin əyləncə sənayesində çalışanlara mənfi təsir göstərəcəyini bildirib.