BAKI,VOA,Yusif Şərifzadə

ABŞ Prezidenti Donald Tramp İran tərəfindən amerikalı hərbçilərin öldürüləcəyi təqdirdə Tehrana qarşı daha sərt hərbi addımlar atılacağını bildirib. O, İranın hər bir ABŞ hərbçisinin ölümü üçün “dəfələrlə bədəl ödəyəcəyini” deyib.

VOA xəbər verir ki, Donald Tramp sosial şəbəkədəki paylaşımında ABŞ hərbçilərinə qarşı hər hansı ölümcül hücuma cavab veriləcəyini açıqlayıb. O bildirib ki, bu göstəriş ABŞ-ın müdafiə naziri Pit Heqsetə, Baş Qərargah Rəisləri Komitəsinin sədri Deniel Keynə və digər hərbi rəhbərlərə çatdırılıb.

Tramp qeyd edib ki, İran tərəfindən törədiləcək hər bir belə hadisə ABŞ tərəfindən daha geniş cavab tədbirləri ilə qarşılanacaq. Onun açıqlaması ABŞ və İran arasında hərbi gərginliyin artdığı bir vaxtda səslənib.

Son günlər bölgədə ABŞ qüvvələri ilə İran arasında qarşılıqlı hücumlar davam edir. Vaşinqton və Tehran bir-birini eskalasiyanı artırmaqda ittiham edir.

ABŞ rəsmiləri daha əvvəl bölgədəki hərbi qüvvələrin təhlükəsizliyinin əsas prioritet olduğunu bildiriblər. İran tərəfi isə ABŞ-ın hərbi əməliyyatlarını qanunsuz hesab etdiyini açıqlayıb.