BAKI,VOA,Yusif Şərifzadə

Küveyt ordusu İran tərəfindən həyata keçirildiyi bildirilən yeni raket və pilotsuz uçuş aparatı hücumlarının qarşısının alınması üçün hava hücumundan müdafiə sistemlərinin fəaliyyət göstərdiyini açıqlayıb.

VOA xəbər verir ki, Küveyt ordusunun yaydığı bəyanatda ölkənin hava hücumundan müdafiə qüvvələrinin İranın yeni hücum dalğasına qarşı mübarizə apardığı bildirilib. Rəsmi açıqlamada hücumlar “günahkar İran təcavüzü” kimi qiymətləndirilib.

Küveyt Silahlı Qüvvələri vətəndaşları və ölkədə yaşayan şəxsləri təhlükəsizlik və müdafiə qurumlarının verdiyi göstərişlərə əməl etməyə çağırıb. Əhaliyə rəsmi məlumatlara diqqət yetirmək və təhlükəsizlik qaydalarına riayət etmək tövsiyə olunub.

Hücumların nəticələri, mümkün itkilər və maddi zərər barədə hələlik əlavə məlumat açıqlanmayıb. İran tərəfi isə Küveytə qarşı son hücumlarla bağlı rəsmi açıqlama verməyib.

Küveyt və digər Körfəz ölkələri son günlər bölgədə artan hərbi gərginlik fonunda təhlükəsizlik tədbirlərini gücləndiriblər.