BAKI, AzerVoice, Nailə Babazadə

ABŞ Prezidenti Donald Trampa etiraz aksiyalarının davam etdiyi İrana qarşı ənənəvi hava hücumları ilə yanaşı, kiber və psixoloji əməliyyat variantlarını ehtiva edən geniş hesabat təqdim edilib.

AzerVoice xəbər verir ki, CBS News kanalına danışan ABŞ Müdafiə Nazirliyinin rəsmiləri Prezident Trampın İrana qarşı istifadə edilə biləcək hərbi və gizli vasitələr barədə ətraflı məlumatlandırıldığını bildiriblər. Məlumata görə, mümkün hərbi müdaxilə zamanı hava qüvvələri və uzaqmənzilli raketlər əsas rolunu qoruyub saxlasa da, kiber əməliyyatlar və psixoloji fəaliyyətlər də masadakı variantlar arasındadır.

Bu əməliyyatların İranın komandanlıq strukturu, rabitə şəbəkələri və dövlət tərəfindən idarə olunan medianı hədəf ala biləcəyi iddia edilir. Bununla belə, rəsmilər hələlik yekun qərarın verilmədiyini və diplomatik kanalların açıq qaldığını vurğulayıblar. Ağ Evin sözçüsü Karoline Leavitt isə bildirib ki, Tramp ilk növbədə diplomatiyaya üstünlük verir, lakin hərbi gücdən istifadə variantı hər zaman gündəmdədir.

Xatırladaq ki, İranda 28 dekabr 2025-ci ildə iqtisadi çətinliklər və milli valyutanın dəyərdən düşməsi səbəbindən başlayan etirazlar ölkənin bir çox şəhərinə yayılıb. Zorakılıq hallarının artması ilə əlaqədar yanvarın 9-da ölkə üzrə internet kəsilib.

İran İnsan Haqları Aktivistləri Xəbər Agentliyinin (HRANA) 16-cı günlə bağlı hesabatına əsasən, nümayişlərdə 133-ü təhlükəsizlik əməkdaşı olmaqla cəmi 646 nəfər həyatını itirib. Həmçinin indiyədək 10 min 721 nəfərin saxlanıldığı bildirilir.