Türkiyə Hərbi Dəniz Qüvvələri Somali silahlı qüvvələri ilə birgə həyata keçirdiyi əməliyyat nəticəsində Somali sularında dəniz quldurları tərəfindən qaçırılan gəmini azad edib. Moqadişu hökumətinin şənbə günü yaydığı bəyanata görə, bir neçə gün davam edən şiddətli toqquşmalarda 14 pirat məhv edilib.

Bu haqda Somali hökumətinin rəsmi bəyanatında bildirilir.

"On gün davam edən əməliyyat zamanı quldurların istifadə etdiyi dörd qayıq məhv edilib və 14 pirat öldürülüb. Davamlı hərbi təzyiq nəticəsində qalan quldurlar gəmini tərk etmək məcburiyyətində qalıblar. Qüvvələrimiz 'MV LATUF' gəmisinin təhlükəsizliyini tam təmin edib və gəmi artıq səfərini təhlükəsiz şəkildə davam etdirir".-deyə bəyanatda qeyd edilir.

"Marine Traffic" gəmi izləmə platformasının məlumatına görə, Kamerun bayrağı altında üzən "MV LATUF" gəmisi iyulun sonunda Türkiyədən çıxaraq Tanzaniyanın Dar əs-Salam limanına doğru yola düşüb. Beynəlxalq media gəminin Türkiyə istehsalı olan silahlar daşıdığını iddia etsə də, AFP agentliyinin sorğusuna cavab verən Somalinin federal rəsmiləri bu məlumatı təsdiqləməyib.

Türkiyə və Somali qüvvələrinin birgə əməliyyatı iki ölkə arasında imzalanmış müdafiə sahəsində əməkdaşlıq sazişi çərçivəsində həyata keçirilib.

Somali sahillərində dəniz quldurluğu 2000-ci illərdə geniş vüsət almış, 2011-ci ildə pik həddə çatdıqdan sonra beynəlxalq hərbi dəniz missiyaları və ticarət gəmilərinin təhlükəsizlik tədbirləri nəticəsində əhəmiyyətli dərəcədə cilovlanmışdı. Lakin aprel ayından etibarən hücumlar yenidən artıb; ən azı beş yük gəmisi girov götürülüb ki, onlardan sonuncusu 20 avqustda Yəmən sahillərində ələ keçirilmişdi.