BAKI,VOA,Yusif Şərifzadə

İranın dəstəklədiyi İraq silahlı qruplarından “Kətaib Seyyid əş-Şühəda” ölkədə silahların dövlət nəzarətinə verilməsi istiqamətində səylərlə yalnız 10 şərtin yerinə yetiriləcəyi halda əməkdaşlıq edəcəyini açıqlayıb. Qrupun irəli sürdüyü əsas şərt ABŞ hərbi qüvvələrinin İraq ərazisindən tamamilə çıxarılmasıdır.

VOA xəbər verir ki, “Kətaib Seyyid əş-Şühəda” yaydığı açıqlamada ABŞ-nin İraqdakı hərbi mövcudluğunun hansı ad və əsas altında olmasından asılı olmayaraq tamamilə dayandırılmasını tələb edib. Qrup uzun müddətdir İran İslam İnqilabı Keşikçiləri Korpusu ilə yaxın əlaqələrə malikdir.

Silahlı qrup İraqın hava məkanından qonşu dövlətlərə hücumların həyata keçirilməsi üçün istifadəyə də yol verilməməsini tələb edib. Açıqlamada ölkənin hava məkanına tam nəzarətin təmin olunmasının vacibliyi vurğulanıb.

Qrup silahların yalnız dövlətin nəzarətinə verilməsinin İraqın silahlı qüvvələrinin və hava hücumundan müdafiə imkanlarının gücləndirilməsi ilə paralel həyata keçirilməsini istəyir. Təşkilat bu tədbirləri ölkənin təhlükəsizliyinin təmin olunması üçün əsas şərtlər sırasında göstərib.

Digər tələblər arasında Kürdüstan Fəhlə Partiyasının silahlı üzvlərinin İraq ərazisindən çıxarılması da var. Qrup, həmçinin İraq Kürdüstanındakı sərhədlərin mərkəzi hökumətin tam nəzarətinə verilməsini tələb edir.

“Kətaib Seyyid əş-Şühəda” İraqın şimalında yerləşən İran müxalifət qruplarının da ölkə ərazisindən çıxarılmasını istəyib. Açıqlamada bütün bu məsələlərin silahların dövlət nəzarətinə verilməsi prosesi ilə birlikdə həll olunmasının vacibliyi vurğulanıb.

Bəyanat Bağdad hökumətinə İranın dəstəklədiyi silahlı birləşmələrin silahlarının dövlət nəzarətinə verilməsi ilə bağlı təzyiqlərin artdığı bir vaxtda yayılıb. İraqın siyasi rəhbərliyi silahlı qrupların tərksilah olunması üçün sentyabrın 30-dək vaxt müəyyən edib.