BAKI,VOA,Yusif Şərifzadə

İranın xarici işlər naziri Abbas Əraqçi müsəlman ölkələrini aralarındakı fikir ayrılıqlarını kənara qoymağa və böyük dövlətlərin “həddindən artıq tələblərinə” qarşı birlikdə hərəkət etməyə çağırıb. O, İranın müsəlman dünyasında birliyin möhkəmləndirilməsi istiqamətində fəaliyyətini davam etdirəcəyini bildirib.

VOA xəbər verir ki, İranın “Tasnim” xəbər agentliyinin məlumatına görə, Əraqçi Səudiyyə Ərəbistanı, Misir, Türkiyə və Pakistanı “müsəlman dünyasının böyük ailəsinin” üzvləri kimi xarakterizə edib.

“Biz bütün şəraitlərdə müsəlman dünyası daxilində birliyə çalışacağıq”, – deyə İranın xarici işlər naziri bildirib.

Əraqçi etiraf edib ki, İranla bəzi müsəlman ölkələri arasında fikir ayrılıqları, hətta ciddi ixtilaflar mövcuddur. Bununla belə, onun fikrincə, mövcud ziddiyyətlər müsəlman dövlətlərinin daha geniş məsələlərdə əməkdaşlığına mane olmamalıdır.

“Fikir ayrılıqları var və hətta bəzi İslam ölkələri ilə ciddi ixtilaflarımız ola bilər. Lakin bütün bu fikir ayrılıqlarını kənara qoymalıyıq ki, müsəlman dünyası böyük dövlətlərin həddindən artıq tələblərinə qarşı dayana bilsin”, – Əraqçi vurğulayıb.

İranın xarici işlər naziri son münaqişə zamanı İran xalqının nümayiş etdirdiyi müqavimətdən də danışıb. Onun sözlərinə görə, iranlılar 40 gün ərzində mövqelərini qoruyaraq təzyiqlərə qarşı dayanıqlılıq nümayiş etdiriblər.

Əraqçi İran xalqının bu müqavimətlə müsəlman dünyasına “böyük dərs” verdiyini iddia edib. Onun açıqlaması Tehran rəsmilərinin son dövrdə regional əməkdaşlıq, müsəlman ölkələri arasında birlik və xarici qüvvələrdən asılılığın azaldılması ilə bağlı çağırışlarını gücləndirdiyi bir vaxta təsadüf edir.