BAKI,VOA,Yusif Şərifzadə

İran İslam İnqilabı Keşikçiləri Korpusu ölkənin cənub-şərqində yerləşən Səravan şəhərində silahlı qrupa qarşı əməliyyat keçirildiyini açıqlayıb. İranın “Fars” xəbər agentliyinin məlumatına görə, əməliyyat nəticəsində bir nəfər öldürülüb, qrupun altı üzvü və tərəfdarı saxlanılıb.

VOA xəbər verir ki, İran İslam İnqilabı Keşikçiləri Korpusu əməliyyatın əvvəlcədən əldə edilmiş kəşfiyyat məlumatları əsasında Qüds quru qüvvələri ilə birgə həyata keçirildiyini bildirib. Qurum əməliyyat zamanı “terrorçu qrupun ağır zərbə aldığını” iddia edib.

Məlumata görə, əməliyyat zamanı qrupun istifadə etdiyi ərazidə axtarış aparılıb. İran qüvvələri burada 20 bağlama partlayıcı maddə və partlayıcı qurğuların hazırlanmasında istifadə olunan vasitələr aşkar etdiklərini bildiriblər.

Bundan başqa, yüngül və orta ağırlıqlı silahların, eləcə də peyk rabitəsi üçün nəzərdə tutulan “Starlink” cihazlarının ələ keçirildiyi açıqlanıb. Aşkarlanan silah və avadanlıqların dəqiq sayı barədə əlavə məlumat verilməyib.

İnqilab Keşikçiləri Korpusu qrupun vilayətin cənubundakı müxtəlif hədəflərə hücumlar həyata keçirməyə hazırlaşdığını iddia edib. İran tərəfinin açıqlamasına görə, planlaşdırılan hücumlar davam edən müharibə ilə əlaqəli olub.

İran qurumu saxlanılan şəxslərin İsrail və ABŞ ilə əlaqəli olduğunu da iddia edib. Lakin təqdim olunan məlumatda bu iddianı təsdiqləyən müstəqil sübutlar göstərilməyib.

Saxlanılan şəxslərin kimliyi və hansı təşkilata mənsub olduqları barədə də ətraflı məlumat açıqlanmayıb. İran hakimiyyəti əməliyyatla bağlı araşdırmaların davam edib-etmədiyinə dair əlavə məlumat verməyib.