BAKI, AzerVoice
Nüvə proqramı, uranın zənginləşdirilməsi və insan haqları məsələləri İrana qarşı bəhanələrdir.
AzerVoice xəbər verir ki, bu sözləri İranın Ali Dini Lideri Ayətullah Seyid Əli Xamenei İsrailin ölkəyə qarşı həyata keçirdiyi son hücumunda həlak olanların anım mərasimində çıxış edərkən deyib.
O, Qərbin təzyiqlərinə meydan oxuyaraq ölkəsinin irəliləmək və zirvələrə çatmaq əzmində olduğunu bəyan edib.
“Onların nüvə proqramı, uranın zənginləşdirilməsi və insan haqları kimi bəhanələrlə irəli sürdüyü ittihamların heç bir əsası yoxdur. Əslində onları narahat edən əsas məsələ, İranda elmin, texnologiyanın, humanitar və dini sahələrin güclənməsi və bu sahələrdə yeni yanaşmaların ön plana çıxmasıdır” - deyə, Xamenei bildirib.
“Düşmənlərə baxmayaraq, İranı tərəqqi və şöhrət zirvəsinə çatdıracağıq. İran xalqı bu potensiala malikdir və Allahın izni ilə bu məqsədlərə nail olacaq” - deyə, o əlavə edib.
Xamenei, həmçinin qeyd edib ki, İran xalqı 12 günlük müharibə zamanı böyük uğurlar əldə etməklə bərabər, qətiyyəti və dirənişi ilə dünyaya gücünü nümayiş etdirib.
O bildirib ki, bu hadisələr İran üçün yeni deyil və ölkə inqilabdan bu yana daxili fitnələr, hərbi və siyasi sui-qəsdlər, hətta çevriliş cəhdləri daxil olmaqla bir çox sınaqlardan keçib və onların öhdəsindən gəlib.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək rütbəli hərbçi, o cümlədən İran Silahlı Qüvvələrinin Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər həlak olub. İran BMT Təhlükəsizlik Şurasının hadisə ilə əlaqədar fövqəladə iclas çağırılmasını istəyib.
Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.
İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.