BAKI,VOA,Yusif Şərifzadə

İran Silahlı Qüvvələri ABŞ-nin ölkə ərazisinə endirdiyi son zərbələrə cavab olaraq hərbi əməliyyata başladığını açıqlayıb. İran tərəfinin məlumatına görə, bölgədəki ABŞ hərbi bazaları və maraqları raketlər və pilotsuz uçuş aparatları ilə hədəfə alınır.

VOA xəbər verir ki, İranın “Təsnim” xəbər agentliyi Silahlı Qüvvələrə istinadən cavab əməliyyatının başladığını bildirib. İran ordusunun açıqlamasına əsasən, bölgədə ABŞ-yə məxsus hərbi obyektlər və digər hədəflərə raket və pilotsuz uçuş aparatları ilə zərbələr endirilir.

İran tərəfi əməliyyatın ABŞ-nin ölkə ərazisində həyata keçirdiyi son hücumlara cavab olduğunu bildirib. ABŞ Prezidenti Donald Tramp daha əvvəl Hörmüz boğazı yaxınlığındakı İran hədəflərinə zərbələrin davam etdiyini açıqlamışdı.

İran Silahlı Qüvvələri bundan əvvəl də ölkəyə hücumların həyata keçirilməsi üçün istifadə olunan bölgədəki hər hansı obyektin hədəfə çevrilə biləcəyi barədə xəbərdarlıq etmişdi.

İranın son cavab əməliyyatının hansı ölkələrdəki ABŞ bazalarını əhatə etdiyi və zərbələrin nəticələri barədə hələlik ətraflı məlumat açıqlanmayıb.