BAKI,VOA, Fərid Mikayılov

İranla ABŞ arasında əldə olunmuş kövrək atəşkəs yeni hücumlar fonunda ciddi sınaqla üzləşib .

VOA xəbər verir ki, Birləşmiş Ərəb Əmirliklərinə qarşı raket və pilotsuz uçuş aparatları ilə hücum edildiyi bildirilib.

ABŞ hərbi qüvvələri isə Hörmüz boğazında yerləşən üç hərbi gəmini hədəf alan hücumların qarşısını aldığını və cavab olaraq İranın hərbi obyektlərinə zərbələr endirdiyini açıqlayıb .

Bildirilib ki, tərəflər arasında mümkün razılaşma ilə bağlı danışıqlar davam etsə də, hələ yekun qərar qəbul edilməyib. İran tərəfi vasitəçi rolunda çıxış edən Pakistanın təqdim etdiyi təklifləri nəzərdən keçirdiyini açıqlayıb .

ABŞ Prezidenti Donald Tramp isə bəyan edib ki, razılaşma əldə olunmazsa, daha sərt addımlar atıla bilər. Bununla yanaşı, ABŞ hərbi rəhbərliyi regionda eskalasiyanın istənilmədiyini, lakin qüvvələrin müdafiə məqsədilə hazır vəziyyətdə saxlanıldığını vurğulayıb .

Eyni zamanda, Hörmüz boğazında gəmiçilik fəaliyyətinə nəzarətin gücləndirilməsi ilə bağlı İranın yeni qurum yaratdığı bildirilir. Bu addım beynəlxalq ticarət və enerji daşımalarının təhlükəsizliyi ilə bağlı əlavə narahatlıqlar yaradıb .