BAKI,VOA,Yusif Şərifzadə

Livan parlamentinin sədri Nəbih Bərri bildirib ki, ABŞ BMT-nin Livandakı Müvəqqəti Qüvvələrinin səlahiyyət müddətinin uzadılmasına razılıq verməzsə, Livanın cənubunda Avropa ölkələri və ABŞ-nin dəstəklədiyi alternativ BMT sülhməramlı qüvvəsinin yerləşdirilməsi zəruri olacaq.

VOA xəbər verir ki, Nəbih Bərri “Əş-Şərq əl-Əvsət” qəzetinə müsahibəsində BMT mandatı olmadan Livanın cənubunda beynəlxalq qüvvələrin mövcudluğu üçün hüquqi əsasın olmayacağını bildirib.

Livan parlamentinin sədrinin sözlərinə görə, beynəlxalq qüvvələrin bölgədə mövcudluğu Livan ordusunun ölkənin bütün ərazilərində dövlət suverenliyini təmin etməsi baxımından mühüm əhəmiyyət daşıyır. Berri bunun İsrail qüvvələrinin Livan ərazisindən tamamilə çıxması ilə şərtləndiyini vurğulayıb.

Bərri Livanın cənubunda beynəlxalq qüvvələrin mövcudluğuna alternativ olaraq Livanla İsrail arasında ikitərəfli razılaşmaların bağlanması təklifini rədd edib. O bildirib ki, İsrail ABŞ-nin vasitəçiliyi ilə əldə edilmiş “çərçivə sazişi” üzrə razılaşdırılmış şərtləri yerinə yetirmədiyi müddətdə belə bir yanaşma qəbuledilməzdir.

Livan parlamentinin sədri əvvəlcə sözügedən “çərçivə sazişi”nə qarşı çıxsa da, sonradan onun ölkənin cənubundakı inzibati bölgüyə uyğun olaraq rayonlar səviyyəsində genişləndirilməsini təklif edib.

Bərri hesab edir ki, Livanın cənubunda beynəlxalq qüvvələrin fəaliyyətinin hüquqi əsasının qorunması dövlətin bölgədə suverenliyinin möhkəmləndirilməsi üçün mühüm şərtdir. Onun fikrincə, bu qüvvələrin fəaliyyəti Livan ordusunun cənub bölgələrində mövqelərini gücləndirməsinə də yardım edə bilər.

BMT-nin Livandakı Müvəqqəti Qüvvələrinin hazırkı səlahiyyət müddətinin dekabrın 31-də başa çatması nəzərdə tutulur. Bu səbəbdən missiyanın gələcəyi və onu əvəz edə biləcək yeni beynəlxalq mexanizmin yaradılması Livanın əsas təhlükəsizlik məsələlərindən birinə çevrilib.