BAKI, AzerVoice
Türkiyə Xarici İşlər Nazirliyi, ölkənin Fələstin siyasətinə yönəlmiş ittihamların tamamilə əsassız olduğunu bildirərək, bu siyasəti qaralamaq və ictimaiyyəti siyasi motivlərlə yanlış yönləndirmək cəhdlərini qətiyyətlə rədd etdiyini bəyan edib.
AzerVoice xəbər verir ki, bu barədə nazirlik tərəfindən yayılan bəyanatda deyilir.
Bəyanatda son günlərdə irəli sürülən iddiaların reallığı əks etdirmədiyi vurğulanıb:
“Türkiyənin Fələstinlilərə verdiyi dəstəyi siyasi məqsədlərlə ləkələməyə çalışan bu cəhdləri rədd edirik. Türkiyə, Fələstin məsələsində hüquq və ədalət tərəfdarı olan müstəqil bir siyasət yürüdür və İsrailin Qəzzada törətdiyi soyqırım cinayətlərinə qarşı ən güclü reaksiya verən ölkələrdən biridir. İsrailli siyasətçilərin hər fürsətdə ölkəmizi hədəfə alması, Türkiyənin doğru yolda olduğunu sübut edir.”
Nazirliyin məlumatına görə, dezinformasiyaya əsaslanan iddiaların əksinə olaraq, Türkiyə, Boqotada qəbul edilən ortaq bəyanatın tələblərindən daha irəli addımlar atıb və onları artıq tətbiq edib. Xüsusilə vurğulanıb ki, ötən ilin may ayından etibarən Türkiyə İsraillə bütün ticarət əlaqələrini – həm ixracat, həm də idxalatı tamamilə dayandırıb. Bu qərar tətbiq olunarkən fələstinlilərin zərər çəkməməsi üçün bütün zəruri tədbirlər də diqqətlə həyata keçirilib.
Bəyanatda, Türkiyənin İsrailə qarşı beynəlxalq platformalarda hərbi məqsədli satışların dayandırılması üçün də qabaqcıl rol oynadığı qeyd olunub:
"Ankara, Birləşmiş Millətlər Təşkilatında (BMT) İsrailə silah tədarükünün dayandırılması təşəbbüsünə 52 ölkənin dəstəyi ilə liderlik edib" - deyə, bəyanatda bildirilib.
Bundan başqa, humanitar yardım daşıyan “Madlin” gəmisinin vəziyyətinin ilk gündən etibarən yaxından izlənildiyi, İsrailin gəmiyə qarşı həyata keçirdiyi qanunsuz müdaxilənin beynəlxalq ictimaiyyətin gündəminə gətirildiyi və gəmidəki Türkiyə vətəndaşlarının azad edilməsi üçün hər cür diplomatik addımın atıldığı da bildirilib.
Nazirlik bəyan edib ki, Türkiyə Qəzzadakı fələstinlilərin zorla köçürülməsini nəzərdə tutan hər cür plana açıq şəkildə qarşı çıxır və bu çərçivədə İslam Əməkdaşlıq Təşkilatının Qəzzanın yenidən qurulmasına dair planına dəstək verir, fələstinlilərin sürgün edilməsinə qarşı hər cür təşəbbüsə qatılır.
Bəyanatda, Türkiyənin hüquqi sahədə də Fələstin məsələsinin ən güclü müdafiəçilərindən biri olduğu qeyd edilib. Türkiyə, Beynəlxalq Ədalət Məhkəməsində (UAD) İsrailə qarşı açılmış soyqırım işinə müdaxilə edən 13 ölkədən biridir və hazırda məhkəmədə davam edən iki ayrı məsləhət prosesinə də aktiv şəkildə dəstək verir.
Son olaraq, İsrail tərəfindən öldürülən Türkiyə vətəndaşı Ayşenur Ezgi Eygi və ABŞ-da saxlanılıb 9 may tarixində sərbəst buraxılan Rümeysa Öztürk məsələlərində də Türkiyənin ilk gündən lazımi hüquqi və siyasi dəstəyi göstərdiyi vurğulanıb.