BAKI,VOA,Yusif Şərifzadə

TikTok-un ABŞ üzrə təhlükəsizlik direktoru Uill Ferrell sentyabrın 15-də ABŞ Konqresinin nümayəndələr palatasında ifadə verəcək. Dinləmə zamanı şirkətin Çinlə əlaqələri və məlumat təhlükəsizliyi məsələləri müzakirə olunacaq.

VOA xəbər verir ki, TikTok ABŞ-ın təhlükəsizlik üzrə baş direktoru Uill Ferrell ABŞ Nümayəndələr Palatasının Çin üzrə xüsusi komitəsinin qarşısında çıxış edəcək.

Konqres nümayəndələri şirkətin məlumatların qorunması, kibertəhlükəsizlik siyasəti və Çinin TikTok-un ABŞ fəaliyyətinə mümkün təsiri ilə bağlı suallar ünvanlayacaqlar.

TikTok-un sahibi olan ByteDance şirkəti ABŞ bölməsində 19,9 faiz payını saxlayır. Şirkətin struktur dəyişikliyi ilə bağlı bəzi detallar hələ tam açıqlanmayıb və dinləmə zamanı ABŞ Prezidenti Donald Trampın bu prosesdəki rolu ilə bağlı sualların da səslənəcəyi gözlənilir.

2024-cü ildə qəbul edilən qanuna əsasən, ByteDance ya TikTok-un ABŞ fəaliyyətini satmalı, ya da platformanın ölkədə fəaliyyətinin dayandırılması ilə üzləşməli idi. ABŞ qanunvericiləri şirkət rəhbərliyinin Çin hökumətinin təsiri altında ola biləcəyindən narahat olduqlarını bildiriblər.

Razılaşmaya əsasən, TikTok-un ABŞ əməliyyatlarına nəzarət bu il ABŞ kapitallı birgə müəssisəyə verilib. Yeni struktur TikTok USDS Joint Venture LLC adı ilə fəaliyyət göstərir.

Bu qurumun əsas investorları arasında bulud texnologiyaları şirkəti Oracle, investisiya şirkəti Silver Lake və Əbu-Dabidə yerləşən MGX investisiya fondu yer alır.