BAKI,VOA,Yusif Şərifzadə

İran tərəfindən həyata keçirilən raket və mərmi hücumları nəticəsində Hörmüz boğazında gəmi hərəkəti əhəmiyyətli dərəcədə azalıb. Bu vəziyyət qlobal enerji bazarlarında narahatlıq yaradıb və yanacaq qiymətlərinin artmasına səbəb olub.

VOA xəbər verir ki, bölgədəki bir sıra ölkələrin hava hücumundan müdafiə sistemləri İran tərəfindən atılan raket və mərmilər səbəbindən gecə və səhər saatlarında aktiv fəaliyyət göstərib.

Məlumata görə, hücumlar Hörmüz boğazından keçən kommersiya gəmilərinin hərəkətinə təsir edib. Ötən gün boğazdan keçən gəmilərin sayı son beş həftənin ən aşağı göstəricisinə düşüb.

Bildirilib ki, həmin gün yalnız altı gəmi Hörmüz boğazından keçib. Bir gün əvvəl isə bu rəqəm 14 gəmi təşkil edib.

Müşahidəçilərin fikrincə, gəmilərin hücum riskindən yayınmağa çalışması qlobal enerji bazarında qiymət artımına səbəb olur.

Hörmüz boğazı dünya enerji daşımalarının əsas marşrutlarından biri hesab olunur. Qlobal enerji bazarlarına daxil olan yanacağın təxminən 20 faizinin bu su yolundan keçdiyi bildirilir.

Gəmiçilikdə yaranan qeyri-müəyyənlik neft və yanacaq bazarlarında qiymətlərin yüksəlməsinə səbəb olub. Bir sıra ölkələrdə yanacaqdoldurma məntəqələrində qiymət artımı müşahidə edilir.