BAKI,VOA, Nailə Babazadə
Pakistan hökumətinin adı açıklanmayan yüksək rütbəli rəsmiləri, paytaxt İslamabadda ABŞ və İran arasında keçirilməsi planlaşdırılan ikinci raund nüvə danışıqları öncəsi pərdəarxası məqamları açıqlayıblar.
VOA xəbər verir ki, verilən məlumata görə, Vaşinqton administrasiyası İranın nüvə proqramının dondurulması (moratoryum) ilə bağlı ilkin tələblərində müəyyən güzəştlərə getməyə "şərtli olaraq" razıdır.
Bildirilir ki, Ağ Evin əsas prioritetləri sanksiyaların yüngülləşdirilməsi və İranın dondurulmuş maliyyə aktivlərinin sərbəst buraxılması müqabilində Tehranın uranı zənginləşdirmə proqramını ən azı 20 il müddətinə dayandırmasıdır. Lakin diplomatik mənbələr qeyd edir ki, əgər Tehran nüvə silahı əldə etməyəcəyinə dair beynəlxalq səviyyədə güclü zəmanətlər verərsə, ABŞ bu müddəti 20 ildən 10 ilə endirməyə hazırdır.
Masadakı digər önəmli təklif isə İranın hazırkı zənginləşdirilmiş uran ehtiyatının 10 il müddətinə ABŞ-a və ya razılaşdırılmış üçüncü bir ölkəyə təhvil verilməsidir. Pakistanlı rəsmilərin sözlərinə görə, İran tərəfi Beynəlxalq Atom Enerjisi Agentliyi (BAEA) ilə əməkdaşlıq çərçivəsində nüvə proqramının dörd ölkə tərəfindən monitorinq edilməsi təklifinə müsbət yanaşsa da, ABŞ-ın digər şərtlərinə hələlik rəsmi cavab verməyib.
Xatırladaq ki, fevralın 28-də ABŞ və İsrailin İrana hücumları ilə başlayan hərbi gərginlik aprelin 8-də keçici atəşkəslə nəticələnmişdi. Aprelin 11-də İslamabadda keçirilən ilk raund danışıqlar uğursuz olsa da, hazırda yeni diplomatik dalğa gözlənilir. ABŞ mediası vitse-prezident JD Vansın bu gün məhz bu müzakirələr üçün İslamabada gələcəyini iddia edir. Pakistanlı vasitəçilər hər iki tərəfin nümayiş etdirdiyi sərt mövqeyə rəğmən, tərəflərin "orta yol" tapacağına ümid edirlər.
Beynəlxalq Zeytun Şurasının icraçı direktoru Jaime Lillo Lopez ilə görüşdə Azərbaycanın qurum çərçivəsində fəaliyyəti, zeytunçuluq sahəsində beynəlxalq standartların tətbiqi, texniki əməkdaşlıq, sertifikatlaşdırma, ekspert dəstəyi və yerli istehsalçıların beynəlxalq bazarlara çıxış imkanları nəzərdən keçirilib.