BAKI,VOA, Fərid Mikayılov
Beynəlxalq Enerji Agentliyi (BEA) Hörmüz boğazından neft axınının qismən bərpa olunmasının qlobal neft bazarına təsir etdiyini açıqlayıb.
VOA xəbər verir ki, BEA-nın Neft Bazarları Hesabatına əsasən, iyun ayında qlobal neft təklifi əvvəlki ayla müqayisədə sutkada təxminən 4 milyon 100 min barel artaraq 98 milyon 760 min barelə yüksəlib.
Hesabatda qeyd olunub ki, artıma baxmayaraq, qlobal neft hasilatı ABŞ-İsrail və İran arasında baş verən müharibədən əvvəlki səviyyədən sutkada təxminən 9 milyon 400 min barel aşağı qalır.
BEA bildirir ki, ABŞ və İran arasında əldə olunan çərçivə razılaşmasından sonra Körfəz ölkələrində hasilatın qismən bərpası iyun ayında regiondan gələn neft tədarükünü sutkada təxminən 3 milyon 500 min barel artırıb.
Bununla belə, təhlükəsizlik narahatlıqları və ABŞ hərbi donanmasının müşayiətinə ehtiyac səbəbindən Hörmüz boğazından neft daşımaları zaman-zaman məhdudlaşıb. Regionun neft təchizatı hələ də münaqişədən əvvəlki göstəricidən sutkada təxminən 11 milyon 400 min barel aşağıdır.
Hesabatda bildirilir ki, OPEC+ ölkələrinin hasilatı iyunda sutkada təxminən 2 milyon 450 min barel artaraq 38 milyon 390 min barelə çatıb. Bu artımın əsas hissəsi Səudiyyə Ərəbistanı və Küveytin payına düşüb.
OPEC+ xaricindəki ölkələrin neft tədarükü isə sutkada təxminən 1 milyon 630 min barel artaraq 60 milyon 370 min barelə yüksəlib. Bu artımda əsas pay Birləşmiş Ərəb Əmirliklərinə məxsus olub.
BEA-nın proqnozuna görə, Hörmüz boğazından neft keçidi sabitləşərsə, 2026-cı ildə qlobal neft təklifi orta hesabla sutkada 102 milyon 600 min barel təşkil edə bilər.
Agentlik bildirib ki, Hörmüz boğazının idarə olunması ilə bağlı danışıqlar və davam edən təhlükəsizlik riskləri səbəbindən proqnozlar üzərində qeyri-müəyyənlik qalır.
BEA həmçinin 2027-ci ildə qlobal neft hasilatının sutkada təxminən 7 milyon 500 min barel artaraq 110 milyon 100 min barelə çatacağını gözləyir.
IEA bu il üçün qlobal neft tələbi proqnozunu əvvəlki hesabatla müqayisədə sutkada 70 min barel artırıb.
Yeni hesablamaya görə, qlobal neft tələbi 2026-cı ildə əvvəlki illə müqayisədə sutkada təxminən 1 milyon barel azalaraq 103 milyon 460 min barel olacaq.
Agentlik bunun 2020-ci ildən sonra ilk illik azalma olacağını proqnozlaşdırır.
BEA 2027-ci ildə qlobal neft tələbinin sutkada təxminən 2 milyon barel artaraq 105 milyon 470 min barelə yüksələcəyini gözləyir.