BAKI,VOA, Fərid Mikayılov

Yəmən Silahlı Qüvvələri Səudiyyə Ərəbistanındakı Kral Xalid aviabazası və bir sıra enerji obyektlərinə raket zərbələri endirdiyini açıqlayıb.

VOA xəbər verir ki, yerli KİV-in yaydığı məlumata görə, Yəmənin istehsalı olan ballistik raketlərlə Səudiyyə Ərəbistanının Xamis Müşeyt şəhəri yaxınlığında yerləşən Kral Xalid Hərbi Hava Bazası hədəfə alınıb.

Bildirilib ki, hücumlar Riyadın Yəmənə qarşı davam etdirdiyi hərbi əməliyyatlara və blokadaya cavab olaraq həyata keçirilib.

Məlumata əsasən, Yəmən ordusu bundan əvvəl də Səudiyyənin Cizan bölgəsində yerləşən dövlətə məxsus "Saudi Aramco" şirkətinin neft obyektinə bir neçə ballistik raketlə zərbə endirdiyini bəyan edib. İddialara görə, hücumdan sonra Cizanın bəzi ərazilərində elektrik enerjisinin verilməsində fasilələr yaranıb.

Yəmən KİV-i həmçinin Yanbu şəhərində güclü partlayışların baş verdiyini, real vaxt rejimində uçuşları izləyən platformaların isə raket hücumlarından sonra Ər-Riyad və digər şəhərlərə istiqamətlənən bəzi reyslərin marşrutunun dəyişdirildiyini bildirib.

İddialara görə, Yanbu Şahzadə Əbdülmöhsün bin Əbdüləziz Beynəlxalq Hava Limanı və Cizan Beynəlxalq Hava Limanı fəaliyyətini müvəqqəti dayandırıb.

Məlumatda qeyd olunub ki, cümə günü axşam saatlarında isə Səudiyyə Ərəbistanı Hərbi Hava Qüvvələri Yəmənin Hudeydə vilayətində telekommunikasiya obyektləri və neft anbarlarına aviazərbələr endirib.

Qeyd: Xəbərdə yer alan məlumatlar Yəmən tərəfinin və yerli media resurslarının açıqlamalarına əsaslanır. Səudiyyə Ərəbistanı tərəfindən bu iddialarla bağlı rəsmi təsdiq verilməyib.