BAKI,VOA,Yusif Şərifzadə

İran Prezidenti Məsud Pezeşkian ABŞ-la imzalanmış anlaşma memorandumunun ölkəsinin maraqlarına uyğun olduğunu bildirib. O, razılaşmanın heç bir maddəsində İranın hüquqlarından və əsas prinsiplərindən geri çəkilmədiyini deyib.

VOA xəbər verir ki, Pezeşkian açıqlamasında bildirib ki, ABŞ-la imzalanan memorandumun 14 maddəsinin heç birində İran öz hüquqlarından, prinsiplərindən, milli maraqlarından, inqilabi dəyərlərindən və baxışlarından geri addım atmayıb.

İran prezidenti qeyd edib ki, əldə olunan nəticələrin böyük hissəsi İranın xeyrinədir və razılaşmada ABŞ tərəfinə birtərəfli üstünlük verən hər hansı müddəa mövcud deyil.

Pezeşkianın sözlərinə görə, memorandum İran İslam Respublikasının mövqeyini və maraqlarını qoruyacaq şəkildə hazırlanıb. O bildirib ki, Tehran bu sənədlə öz milli məqsədlərinə uyğun nəticələr əldə edib.

ABŞ və İran arasında iyun ayında imzalanan razılaşmaya baxmayaraq, bu ay Fars körfəzi bölgəsində tərəflər arasında hərbi qarşıdurma yenidən başlayıb. Hər iki tərəf qarşılıqlı şəkildə razılaşmanın şərtlərinin pozulduğunu iddia edir.

Son günlər İran və ABŞ rəsmiləri anlaşmanın icrası, Hörmüz boğazında gəmiçilik qaydaları və qarşılıqlı öhdəliklərlə bağlı fərqli mövqelər səsləndirirlər.