BAKI,VOA,Yusif Şərifzadə

İranın ali rəhbəri Müctəba Xamenei ABŞ-ı sərt tənqid edərək Vaşinqtonun son hadisələr fonunda əsl mahiyyətini nümayiş etdirdiyini iddia edib. O, eyni zamanda İran cəmiyyətini milli həmrəyliyi qorumağa və daxili parçalanmadan çəkinməyə çağırıb.

VOA xəbər verir ki, İranın dövlət yayımçısı IRIB tərəfindən yayımlanan yazılı bəyanatda Xamenei ABŞ-ın son davranışlarının onun "aldadıcı, qeyri-məntiqli, etibarsız və pis niyyətli" siyasətini üzə çıxardığını iddia edib. Onun sözlərinə görə, Vaşinqtonun bu addımları İranın ABŞ-a münasibətdə mövqeyini daha da möhkəmləndirib.

İranın ali rəhbəri bildirib ki, "İran xalqının ABŞ üçün unudulmayacaq dərsləri var". O, bu fikrini son günlər ölkənin cənub bölgələrində nümayiş etdirilən cəsarət və qətiyyət nümunələri ilə əsaslandırıb.

Xamenei çıxışında İran üçün əsas prioritetlərdən birinin dövlət və cəmiyyət daxilində məqsəd birliyinin qorunması olduğunu vurğulayıb. O, milli həmrəyliyin möhkəmləndirilməsinin ölkənin təhlükəsizliyi və sabitliyi baxımından həyati əhəmiyyət daşıdığını bildirib.

Ali rəhbər daxili siyasi qarşıdurmaların və fikir ayrılıqlarının dərinləşdirilməsinin yolverilməz olduğunu qeyd edərək, cəmiyyətin bütün təbəqələrini parçalanmaya səbəb ola biləcək addımlardan çəkinməyə çağırıb.

ABŞ tərəfi Xameneinin son bəyanatları ilə bağlı hələlik rəsmi münasibət açıqlamayıb. İranın səsləndirdiyi ittihamlar müstəqil mənbələr tərəfindən təsdiqlənməyib.