BAKI, AzerVoice
HƏMAS, beynəlxalq ictimaiyyəti Qəzza zolağında baş verənlər qarşısında səssiz qalmaqda ittiham edərək, mülki əhalinin aclıq və susuzluqdan ölməsinin qarşısını almaq üçün İsrailə təzyiq göstərilməsinə çağırıb.
AzerVoice xəbər verir ki, bu barədə HƏMAS-ın yaydığı açıqlamada bildirilib.
“Qəzza zolağında son 5 ayda Fələstin xalqına qarşı intensivləşdirilən aclıq siyasəti, müharibə cinayətkarı İsrail Baş naziri Benyamin Netanyahunun hökumətinin əməllərini susqunluqla izləyən beynəlxalq ictimaiyyətin üzərində bir utanc ləkəsidir” - deyə, açıqlamada qeyd olunub.
Avropa İttifaqı və digər Qərb ölkələrinə ünvanlanan çağırışda İsrailə qarşı təsirli siyasi addımlar atmaq, hərbi əməkdaşlığı yenidən nəzərdən keçirmək, mülki şəxsləri hədəf almaqda istifadə olunan silahların tədarükünü dayandırmaq və aclığı kütləvi qətl vasitəsinə çevirdiyi üçün İsraili məsuliyyətə cəlb etmək tələb olunub.
Həmçinin, BMT və beynəlxalq ictimaiyyətdən Qəzzaya şərtsiz və maneəsiz humanitar yardım girişinin təmin olunması üçün İsrailə təzyiq göstərilməsi istənilib.
Bundan əlavə, HƏMAS, ABŞ hökumətini İsrailin hərbi və siyasi cəhətdən himayə olunmasına görə Qəzzadakı soyqırıma şərik olmaqda ittiham edib.
“ABŞ-ın İsrailə dəstəyinin davam etməsi onu müasir tarixdə ən iyrənc cinayətə ortaq edir” - deyə, açıqlamada vurğulanıb.
Qeyd edək ki, Qəzza zolağı İsrailin hücumları və humanitar yardımın girişini məhdudlaşdıran sərt mühasirəsi altında ciddi bir humanitar fəlakət yaşayır. Su, dərman, tibbi ləvazimat və gigiyena vasitələrinin çatışmazlığı fonunda aclıq yayılır və ölüm halları artır. Ən çox təsirə məruz qalanlar isə uşaqlardır. Bu günə qədər 81-i uşaq olmaqla azı 113 fələstinli aclıqdan həyatını itirib.
Həmçinin qeyd edək ki, İsrailin 2023-cü il oktyabrın 7-dən bəri Qəzza zolağına həyata keçirdiyi hücumlarda azı 59 587 fələstinli həlak olub, 143 498 nəfər yaralanıb. İsrail ordusu mülki infrastrukturu məhv edərək Qəzzanın 88 faizini dağıdıb, sürgün əmrləri ilə milyonlarla fələstinlini yerlərindən edib və onların sığındığı bölgələri mütəmadi olaraq hədəfə alır. İsrail ordusu gündəlik həyata keçirdiyi hücumlarla məcburi köçkünlərin çadırlarını və sığındıqları mülki məntəqələri bombalamağa davam edir.