BAKI,VOA,Yusif Şərifzadə

İran Xarici İşlər Nazirliyinin sözçüsü İsmayıl Bəqai ABŞ Mərkəzi Komandanlığının Amerika hərbi qüvvələrinin mülki şəxsləri hədəfə almadığı barədə açıqlamasını rədd edib. O, ABŞ ordusunun keçmişdə Əfqanıstan və İraqda həyata keçirdiyi hücumları xatırladaraq Vaşinqtonun mövqeyini tənqid edib.

VOA xəbər verir ki, İsmayıl Bəqai sosial şəbəkədə yaydığı açıqlamada ABŞ Mərkəzi Komandanlığının sözçüsünün Amerika ordusunun keçmiş hərbi əməliyyatlarını unutduğunu bildirib. İran rəsmisi mülki şəxslərin, o cümlədən qadın və uşaqların həlak olduğu hücumları buna nümunə göstərib.

Bəqai 2002-ci ildə Kakarakda, 2004-cü ildə Mukaradibdə, 2008-ci ildə isə Deh Bala və Veç Baqtu bölgələrində həyata keçirilmiş ABŞ hücumlarını xatırladıb. Onun sözlərinə görə, Əfqanıstan və İraqda baş verən həmin hadisələr zamanı mülki şəxslər həlak olub.

İran Xarici İşlər Nazirliyinin sözçüsü ABŞ istehsalı olan “Vətən” televiziya serialının dördüncü mövsümündə Pakistanda toy mərasiminə pilotsuz uçuş aparatı ilə zərbə endirilməsinin təsvir olunduğunu da qeyd edib. O, serialdakı hadisədə təxminən 40 mülki şəxsin öldüyünün göstərildiyini bildirib.

Bəqayi bununla ABŞ Mərkəzi Komandanlığının mülki şəxslərin hədəfə alınmadığı barədə mövqeyini əsaslandırılmamış hesab etdiyini bildirib.

İran rəsmisi Sirikdə baş verən hadisənin uydurma olmadığını vurğulayıb. O, orada zərər çəkən mülki şəxslərin və həlak olanların real olduğunu bildirib.

İran tərəfi Sirikdə toy mərasiminin keçirildiyi əraziyə ABŞ tərəfindən zərbə endirildiyini bildirir. ABŞ Mərkəzi Komandanlığı isə mülki şəxslərin məqsədli şəkildə hədəfə alındığı barədə ittihamları rədd edir.