BAKI, AzerVoice, Nailə Babazadə

ABŞ dövlət katibi Marko Rubio, 29 Oktyabr — Türkiyə Respublikasının 102-ci ildönümü münasibətilə təbrik mesajı yayıb.

AzerVoice xəbər verir ki, Rubio mesajında ABŞ-Türkiyə münasibətlərinin qlobal sülh, təhlükəsizlik və rifah üçün kritik əhəmiyyət daşıdığını vurğulayıb.

“ABŞ və Amerika xalqı adından, Türkiyə xalqını Respublikanızın qurulmasının 102-ci ildönümü münasibətilə ən səmimi arzularımla təbrik edirəm. ABŞ-Türkiyə münasibətləri qlobal sülh, təhlükəsizlik və rifah baxımından həyati önəmə malikdir.Türkiyə Respublikası, köklü və dəyərli bir NATO müttəfiqidir.” – deyə Rubio bildirib.

ABŞ dövlət katibi həmçinin qeyd edib ki, Türkiyə regional sabitliyin təmin edilməsindən terrorla mübarizəyə, ticarətin genişləndirilməsindən enerji əməkdaşlığının gücləndirilməsinə qədər bir çox sahədə ABŞ üçün vacib tərəfdaşdır.

“İkili əməkdaşlığımız amerikalıların, türklərin və beynəlxalq ictimaiyyətin daha təhlükəsiz və firavan olmasına xidmət etməyə davam edir. Bu münasibətlə Türkiyə Respublikasının qurulmasını birlikdə qeyd edir, güclü tərəfdaşlığımızı və ittifaqımızı daha da möhkəmləndirməyi arzulayırıq.” - deyə Rubio əlavə edib.