BAKI,VOA,Yusif Şərifzadə

Ağ Ev ABŞ və İran arasında əldə olunmuş memorandum of understanding (MoU) razılaşmasının mövcudluğunu təsdiqləyib, lakin sənədin hələ Prezident Donald Tramp tərəfindən imzalanmadığını açıqlayıb.

VOA xəbər verir ki, Ağ Ev Axios-un yayımladığı ilkin məlumatı təsdiqləyərək Vaşinqton və Tehran arasında mühüm çərçivə razılaşmasının hazırlandığını bildirib.

Məlumata görə, MoU aşağıdakı əsas müddəaları əhatə edir:

60 günlük atəşkəsin tətbiqi, Hörmüz boğazının yenidən açılması, İranın 30 gün ərzində minaların təmizlənməsi ilə bağlı öhdəlik götürməsi, Tehranın nüvə silahı istehsal etməməyə dair təminat verməsi, ABŞ-ın isə sanksiyaların yumşaldılması və İran aktivlərinin dondurulmasının aradan qaldırılması məsələsini müzakirə etməsi.

Razılaşmada həmçinin ABŞ dəniz blokadasının mərhələli şəkildə ləğvi və daha sonra zənginləşdirilmiş uranın çıxarılması ilə bağlı danışıqların aparılması nəzərdə tutulur.

Ağ Ev rəsmiləri vurğulayıblar ki, bu sənəd yekun sülh sazişi deyil və tərəflər arasında əvvəlki günlərdə də oxşar çərçivə razılaşmaları ilə bağlı ziddiyyətli açıqlamalar səsləndirilib.

Prezident Donald Tramp isə kabinet iclasında prosesə tələsmədiyini bildirib və mümkün razılaşmanın ABŞ üçün “əlverişli şərtlərlə” yekunlaşmalı olduğunu qeyd edib.

Analitiklər hesab edirlər ki, MoU-nun təsdiqlənməsi ABŞ və İran arasında son aylarda artan gərginlik fonunda mühüm diplomatik dönüş nöqtəsi ola bilər.

Ekspertlərin fikrincə, sənədin qüvvəyə minməsi regionda enerji təhlükəsizliyi, dəniz nəqliyyatı və qlobal bazarlar baxımından mühüm təsirlər yarada bilər.

Müşahidəçilər qeyd edirlər ki, Trampın yekun qərarı həm Vaşinqtonun daxili siyasi hesablamalarından, həm də İranın öhdəlikləri necə yerinə yetirəcəyinə dair qiymətləndirmələrdən asılı olacaq.