Livanlı rejissor Munia Akl "Emmi" mükafatlı ingilis dramaturqu Cek Tornun ssenarisi əsasında "Netflix" üçün çəkiləcək 5 seriyalı "The Unheard" dram serialının rejissoru olacaq. Layihənin baş rolunu "Oskar" və "Emmi" mükafatçısı Keyt Uinslet canlandıracaq.
Serialda Keyt Uinslet ingilis aktrisası Maksin Pik ilə birlikdə planlaşdırdıqları qisas planı uğursuzluqla nəticələndikdən sonra qaçmağa məcbur olan iki bacını canlandıracaq. Hüquq-mühafizə orqanları tərəfindən təqib edilən bacılar onları zorakılığa sürükləyən sirlərlə üz-üzə qalırlar. Tənqidçilər serialın süjet xəttini Ridli Skottun məşhur "Telma və Luiza" (Thelma & Louise) filmi ilə müqayisə edirlər. Çəkilişlərinin 2027-ci ildə başlaması planlaşdırılan serialın yayım tarixi hələ açıqlanmayıb.
"The Unheard" Keyt Uinsletin "Netflix" platforması üçün çəkiləcəyi ilk dram serialı olacaq. Aktrisa daha əvvəl HBO istehsalı olan "Mildred Pierce" və 2021-ci ildə "Mare of Easttown" seriallarındakı rollarına görə "Emmi" mükafatına layiq görülüb. Serialın prodüserliyini "Warp Films", Bred Pittin "Plan B" və ingilis aktyoru Stiven Qrehemin "Matriarch Productions" şirkətləri həyata keçirir.
Munia Aklın ilk tammetrajlı debüt filmi 2020-ci ilin sonunda çəkilmiş və növbəti il Venesiya Film Festivalında premyeriyası keçirilmiş "Kosta Brava, Livan" (Costa Brava, Lebanon) ekran əsəri olub. Film Toronto Beynəlxalq Film Festivalında NETPAC Mükafatını, London BFI Film Festivalında tamaşaçı rəğbəti mükafatını və Misirin Əl-Qunə Film Festivalında FIPRESCI ən yaxşı debüt filmi və "Yaşıl Ulduz" mükafatlarını qazanıb.
Ekran işi çirklənmiş Beyrutu tərk edərək dağlara sığınan, lakin evlərinin yanında zibil poliqonu salınan Bədri ailəsindən bəhs edir. Rejissorun 2016-cı ildə Kann Film Festivalının "Cinefondation" bölməsində nümayiş olunan "Submarine" adlı qısametrajlı filmi də Livanın zibil böhranını mövzu götürmüşdü.
"Ailə mövzusu məni həmişə düşündürüb; ailənin daxili strukturunu müşahidə edərək cəmiyyətdəki çatlar barədə aydın təsəvvür əldə etmək olar. İnanmıram ki, rejissorlar filmlərində hazır mesajlar verməlidirlər, əksinə, onlar cəmiyyət qarşısında suallar qaldırmalıdırlar".-deyə, Rejissor Munia Akl yaradıcılığı barədə deyib.