BAKI,VOA, Fərid Mikayılov
Pakistanın ABŞ və İran arasında vasitəçilik təşəbbüslərinin uğursuzluğa uğraması regionda yeni diplomatik gərginlik yaradıb.
VOA xəbər verir ki, ABŞ-ın “Washington Post” nəşrinə istinadən yayılan məlumata görə, rəsmi İslamabad İranın son anda sülh danışıqlarında iştirakdan imtina etməsinə görə gizli şəkildə narazılıq və qəzəb hissi keçirir.
Mənbələr bildirir ki, Pakistan tərəfi ABŞ və İran arasında vasitəçilik etmək üçün ciddi diplomatik resurslar səfərbər etsə də, Tehranın son anda geri çəkilməsi bu səyləri nəticəsiz qoyub. Bu addımın Pakistanın diplomatik nüfuzuna mənfi təsir etdiyi və iki ölkə arasında gizli gərginliyə səbəb olduğu qeyd olunur.
Məlumata görə, İslamabad bir müddətdir “İslamabad platforması” çərçivəsində tərəfləri bir araya gətirməyə çalışırdı. Lakin İranın qeyri-müəyyən mövqeyi və son anda qəbul etdiyi qərar regionda sülh təşəbbüslərini yenidən risk altına salıb.