BAKI,VOA,Yusif Şərifzadə

İran parlamentinin sədri və ölkənin baş danışıqlarçısı Məhəmməd Baqir Qalibaf bəyan edib ki, Tehranla Vaşinqton arasında davam edən qarşıdurmanın gələcəyi bütün regionun təhlükəsizliyinə təsir göstərə bilər.

VOA xəbər verir ki, Qalibaf "X" sosial şəbəkəsində paylaşdığı açıqlamada bildirib ki, əgər İran neft sata bilməyəcəksə, regionun digər ölkələri də bunu edə bilməyəcək.

"Bizim təhlükəsizliyimiz təmin olunmasa, heç bir infrastruktur təhlükəsiz olmayacaq. Hörmüz boğazının təhlükəsizliyi isə Amerika qüvvələrinin bölgədə olmaması ilə mümkündür", – deyə o qeyd edib.

İran rəsmisi həmçinin vurğulayıb ki, Hörmüz boğazı artıq müharibədən əvvəlki vəziyyətinə qayıtmayacaq. Onun sözlərinə görə, bu strateji dəniz keçidi Vaşinqtonla aparılan danışıqlarda Tehranın əsas təsir və çəkindirmə vasitəsinə çevrilib.

Müharibə başlamazdan əvvəl dünya üzrə xam neft və mayeləşdirilmiş təbii qaz ticarətinin təxminən 20 faizi Hörmüz boğazı vasitəsilə həyata keçirilirdi. Buna görə də boğazda təhlükəsizliklə bağlı istənilən gərginlik qlobal enerji bazarları üçün ciddi əhəmiyyət daşıyır.

Qalibafın açıqlamaları İranın strateji dəniz yolları və enerji marşrutlarını regional təhlükəsizlik və beynəlxalq danışıqlarda mühüm rıçaq kimi qiymətləndirdiyini bir daha nümayiş etdirir.