BAKI,VOA,Yusif Şərifzadə

Pakistan və Misirin xarici işlər nazirləri ABŞ-İsrail ilə İran arasında davam edən qarşıdurmanın gərginliyinin azaldılmasının və diplomatik danışıqlara qayıdışın vacibliyini vurğulayıblar.

VOA xəbər verir ki, Pakistanın xarici işlər naziri Məhəmməd İshaq Dar Misirin xarici işlər naziri Bədr Əbdülati ilə Filippinin paytaxtı Manila şəhərində keçirilən Cənub-Şərqi Asiya Ölkələri Assosiasiyasının (ASEAN) toplantısı çərçivəsində görüşüb.

Pakistan Xarici İşlər Nazirliyinin "X" sosial şəbəkəsində yaydığı məlumata görə, tərəflər Yaxın Şərqdə artan gərginliyi, xüsusilə bunun qlobal dəniz ticarətinə, enerji təhlükəsizliyinə və dünya iqtisadiyyatına mümkün təsirlərini müzakirə ediblər.

Nazirlər ABŞ-İsrail ilə İran arasında münaqişənin daha da dərinləşməsinin qarşısının alınmasının vacibliyini qeyd edərək, bütün tərəfləri diplomatik danışıqlara qayıtmağa çağırıblar.

Görüşdə, həmçinin Pakistan və Misir arasında ikitərəfli münasibətlərin inkişafı, regional əməkdaşlığın gücləndirilməsi və qarşılıqlı maraq doğuran digər məsələlər ətrafında fikir mübadiləsi aparılıb.

Tərəflər regionda sabitliyin qorunmasının beynəlxalq ticarət marşrutlarının təhlükəsizliyi və qlobal iqtisadiyyat üçün mühüm əhəmiyyət daşıdığını vurğulayıblar.