BAKI, AzerVoice, Səməd Əyyubov

ABŞ prezidenti Donald Tramp avqustun 15-də Alyaskada keçiriləcək sammitdə Ukraynada atəşkəs əldə olunması üçün səylər göstərəcək.

AzerVoice-un məlumatına görə, bu barədə Fransa prezidenti Emmanuel Makron, Avropa liderləri və Trampın iştirakı ilə keçirilən onlayn görüşdən sonra açıqlama verib.

Makron bildirib ki, Trampın Rusiya prezidenti Vladimir Putinlə görüşdə əsas məqsədi atəşkəsin tələb olunmasıdır. O, Avropanın mövqeyini xatırladaraq qeyd edib ki, ərazi məsələləri yalnız Ukraynanın iştirakı ilə müzakirə oluna bilər və görüşdə ərazilərin dəyişdirilməsi barədə heç bir müzakirə aparılmayıb.

Fransa lideri əlavə edib ki, Rusiyaya qarşı yeni sanksiyaların tətbiqi istisna deyil.

Qeyd edək ki, Almaniya kansleri Fridrix Mersin təşəbbüsü ilə keçirilən onlayn toplantıda Avropa ölkələrinin dövlət və hökumət başçıları, Tramp və Berlində olan Ukrayna prezidenti Volodimir Zelenski iştirak ediblər. Almaniyanın DPA agentliyinin məlumatına görə, görüşün məqsədi Trampın Alyaskada Putinlə keçirəcəyi danışıqlar öncəsi ortaq mövqelərin müəyyənləşdirilməsi olub.