BAKI, AzerVoice
İran rəsmiləri hesab edir ki, Beynəlxalq Atom Enerjisi Agentliyi (MAQATE) iyun ayında İranın nüvə obyektlərinə ABŞ və İsrail tərəfindən endirilmiş zərbələrin effektivliyini qiymətləndirmək məqsədilə həmin obyektlərdə yoxlamaları davam etdirmək istəyir.
AzerVoice xəbər verir ki, bu barədə İran xarici işlər nazirinin müavini Kazim Qəribabadi BMT çərçivəsində Nyu-Yorkda keçirilən tədbirlər zamanı jurnalistlərə açıqlama verib.
“Bu, mənim üçün böyük bir sualdır – niyə onlar (yəni MAQATE – red.) ora müfəttişlər göndərməkdə israr edirlər? Əgər bu obyektlər doğrudan da məhv edilibsə, narahatlıq üçün heç bir əsas yoxdur. Ora səfər tələbi yalnız bir halda mümkündür - əgər onlar zərbələrin nə dərəcədə effektiv olduğunu öyrənmək istəyirlərsə. Bu, onların əsas motivi olmalıdır” – deyə, Qəribabadi vurğulayıb.
O, həm MAQATE-nin, həm də İsrail rəsmilərinin əvvəlki bəyanatlarına diqqət çəkib.
“Onlar (ABŞ və İsrail – red.) İranın Nətənz, İsfahan və Arakın nüvə obyektlərinin məhv edildiyini iddia etdilər. Arak ilk hücumlar zamanı İsrailin hədəfinə çevrildi və onların dediyinə görə, obyekt tamamilə məhv olunub” - deyə, o bildirib.
Qəribabadi əlavə edib ki, əgər bu obyektlər doğrudan da məhv edilibsə, orada heç bir fəaliyyətin aparılması mümkün deyil.
Xatırladaq ki, İsrail Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək rütbəli hərbçi, o cümlədən İran Silahlı Qüvvələrinin Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər həlak olub. İran BMT Təhlükəsizlik Şurasının hadisə ilə əlaqədar fövqəladə iclas çağırılmasını istəyib.
Bu hücumlara cavab olaraq isə İran Ordusu İsrailə qarşı "Doğru vəd III" adlı əməliyyat keçirib. Təl-Əviv, Qüds və digər bölgələrə yüzlərlə ballistik raket buraxılıb.
ABŞ isə münaqişənin gərginləşməsindən doqquz gün sonra – 22 iyun gecəsi İrandakı üç nüvə obyektinə hücum etməklə münaqişəyə qoşulub. 23 iyun axşamı İran ABŞ-ın Qətərdə yerləşən və Yaxın Şərqin ən böyük Amerika bazası olan Əl-Udeyd bazasına raket zərbəsi endirib. ABŞ hakimiyyət orqanlarının verdiyi məlumata görə, hücum nəticəsində itki və ya ciddi dağıntı qeydə alınmayıb.
İyunun 24-də ABŞ prezidenti Donald Tramp İsrail və İranın tam atəşkəsin qüvvəyə mindiyini bəyan edib. İsrail tərəfi də ABŞ-ın atəşkəs təklifini qəbul etdiyini və qarşıya qoyulan bütün məqsədlərə nail olunduğunu bildirib.