Bakı, AzerVoice

İspaniyanın baş naziri Pedro Sançes ABŞ prezidenti Donald Trampın fələstinliləri Qəzza zolağından zorla çıxarmaq planını qınayır.

AzerVoice xəbər verir ki, Sançes, heç bir daşınmaz əmlak alqı-satqısının Qəzza zolağında insanlığa qarşı cinayətləri gizlədə bilməyəcəyini bildirib.

Sançesin sözlərinə görə, İspaniya Trampın Qəzza ilə bağlı planının həyata keçirilməsinə icazə verməyəcək.

İspaniyanın baş naziri dünyanın hər yerində olduğu kimi Qəzza zolağında da beynəlxalq hüquqa, xüsusilə humanitar hüquqa hörmətlə yanaşmağa çağırıb.

"Fələstinlilər Fələstində, israillilər isə İsraildə sülh, və təhlükəsizlik şəraitində yaşamalıdırlar",- deyə o qeyd edib.

Qeyd edək ki, bundan əvvəl ABŞ prezidenti Donald Tramp Ağ Evdə İsrailin baş naziri Benyamin Netanyahu ilə birgə mətbuat konfransında bildirmişdi ki, ABŞ Qəzza zolağına nəzarəti ələ keçirəcək və silahların çıxarılmasına, həmçinin dağılmış binaların təmizlənməsinə cavabdeh olacaq.

ABŞ prezidenti qeyd edib ki, Qəzza indi nəhəng dağıntı zonasıdır, burada hər şey praktiki olaraq yerlə-yeksan edilib.

Tramp hesab edir ki, Qəzzalıların qonşu ölkələrdə, xüsusilə Misir və İordaniyada salınacaq yeni qəsəbələrə köçməsi daha yaxşı olardı.