BAKI, AzerVoice, Nailə Babazadə
Türkiyənin də aralarında olduğu 9 ölkə, hazırda BMT Təhlükəsizlik Şurasının gündəmində müzakirə edilən Qəzza ilə bağlı qətnaməyə birgə dəstək açıqlayıb.
AzerVoice xəbər verir ki, Türkiyə, ABŞ, Qətər, Misir, Birləşmiş Ərəb Əmirlikləri, Səudiyyə Ərəbistanı, İndoneziya, Pakistan və İordaniyanın BMT-dəki daimi nümayəndəlikləri Qəzza qətnaməsi ilə bağlı ortaq bəyanat yayıb.
Açıqlamada bildirilib ki, adı çəkilən ölkələr ABŞ tərəfindən hazırlanan və hazırda Təhlükəsizlik Şurasında müzakirə olunan Qəzza layihəsinə birgə dəstəklərini ifadə edirlər.
Birgə bəyanatda 29 sentyabrda elan edilən Qəzzada sülh planının bu qətnamədə dəstəkləndiyi, eləcə də Misirin Şarm əl-Şeyx şəhərində keçirilən görüşlərdə iştirakçı dövlətlər tərəfindən təsdiq olunduğu qeyd olunub.
Açıqlamada Filistinlilərin “öz müqəddəratını təyinetmə haqqı”na xüsusi vurğu edilib:
“Bu planın səmimi bir təşəbbüs olduğunu və yalnız israillilər ilə fələstinlilər üçün deyil, bütün bölgə üçün sülhə və sabitliyə aparan real bir yol təqdim etdiyini vurğulamaq istəyirik.” – deyə bəyanatda bildirilib.
Filistin rəsmi agentliyi WAFA-nın yaydığı məlumatda Türkiyə, ABŞ, Qətər, Misir, BƏƏ, Səudiyyə Ərəbistanı, İndoneziya, Pakistan və İordaniyanın dəstək açıqlamasının əhəmiyyəti xüsusi qeyd olunub.
Bəyanatda Qəzza qətnaməsinin “daimi və hərtərəfli atəşkəsin əldə edilməsi, humanitar yardımın maneəsiz çatdırılması, İsrailin Qəzzadan tam şəkildə geri çəkilməsi və bərpa prosesinə dərhal başlanması” baxımından həlledici önəm daşıdığı vurğulanıb.
Sonda, “Fələstin xalqının öz müqəddəratını təyinetmə hüququ və müstəqil Fələstin dövlətinin qurulması zəruridir” ifadəsinə yer verilib və Fələstin rəhbərliyinin “ərazi, xalq və idarəçilik baxımından Qəzza zolağının bütün məsuliyyətini üzərinə götürməyə hazır olduğu” bildirilib.