BAKI,VOA,Yusif Şərifzadə

Kanadanın xarici işlər naziri Anita Anand ABŞ və İranı davam edən hərbi qarşıdurma fonunda təmkinli davranmağa, mülki əhalinin təhlükəsizliyini təmin etməyə və dialoqa üstünlük verməyə çağırıb.

VOA xəbər verir ki, Anita Anand İslamabadda Pakistanın xarici işlər naziri İşaq Dar ilə birgə keçirdiyi mətbuat konfransında Vaşinqton və Tehran arasında davam edən qarşıdurmadan narahat olduğunu bildirib. O, xüsusilə mülki infrastruktura, o cümlədən su təmizləyici qurğulara və enerji obyektlərinə hücumların narahatlıq doğurduğunu qeyd edib.

Kanadanın xarici işlər naziri bildirib ki, mülki obyektlərə yönələn zərbələr insanların həyatını təhlükə altına qoyur. O, bütün tərəfləri hərbi eskalasiyanı azaltmağa və mülki əhalinin qorunmasını əsas prioritet kimi qəbul etməyə çağırıb.

Anand ABŞ və İran arasında gərginliyin həlli üçün diplomatik danışıqların davam etdirilməsinin vacibliyini vurğulayıb. Onun sözlərinə görə, qarşıdurmanın daha da genişlənməsinin qarşısını almaq üçün bütün tərəflər məsuliyyətli davranmalıdır.

Kanadalı nazirin açıqlaması ABŞ və İran arasında ötən ay Pakistanın vasitəçiliyi ilə imzalanmış anlaşma memorandumuna baxmayaraq, hərbi qarşıdurmanın davam etdiyi bir vaxtda səslənib.