BAKI, AzerVoice

İsrailin Baş naziri Benyamin Netanyahunun hərəkətləri və İsrail Müdafiə Ordusunun Qəzza zolağındakı fəaliyyəti Hitlerin cinayətlərini belə geridə qoyub.

AzerVoice xəbər verir ki, bu barədə Türkiyə Prezidenti Rəcəb Tayyib Ərdoğan, "X" sosial şəbəkəsində yazıb.

"Netanyahu və onun qatillər şəbəkəsi barbarlıqda artıq Hitleri də keçib. Avropada Holokost zamanı belə Qəzzadakı kimi qeyri-insani mənzərələr olmamışdı" – deyə, paylaşımda qeyd olunub.

Türkiyə Prezidenti beynəlxalq ictimaiyyəti bu vəhşiliyə səssiz qalmamağa və aclıqdan kütləvi şəkildə həlak olan fələstinlilərlə bağlı tədbir görməyə çağırıb.

Bundan əvvəl HƏMAS bildirmişdi ki, Qəzza zolağında yaşayan 2 milyondan çox insana blokada səbəbindən ölüm təhlükəsi yaranıb. İsrail ordusunun sözçüsü Avixay Edri isə HƏMAS-ın bu ittihamlarını rədd edib və bildirib ki, radikallar KİV vasitəsilə “məğlub HƏMAS-ın qalıqlarını xilas etmək üçün dezinformasiya yayırlar”.

Qeyd edək ki, Yaxın Şərqdə vəziyyət 2023-cü il oktyabrın 7-də HƏMAS-ın Qəzza zolağından İsrail ərazisinə daxil olması ilə kəskinləşib. Buna cavab olaraq İsrail Qəzzanı tam blokadaya aldığını elan edib və anklava, eləcə də Livan və Suriyanın bəzi bölgələrinə zərbələr endirməyə başlayıb.

Bu il martın 2-dən etibarən İsrailin qərarı ilə Qəzza zolağına beynəlxalq humanitar yardım daxil olmur və bütün keçid məntəqələri bağlıdır.

Mayın 18-də İsrail ordusu Qəzzanın şimal və cənub bölgələrində “Gideonun Arabaları” adlı genişmiqyaslı quru əməliyyatına başladığını elan edib. Əməliyyatın məqsədi HƏMAS-ı tamamilə məhv etmək və Qəzzada saxlanılan bütün israilli girovları azad etmək kimi göstərilib. Netanyahu bəyan edib ki, əməliyyatın sonunda İsrail ordusu Qəzza zolağının bütün ərazisinə nəzarət etməyi planlaşdırır.