BAKI,VOA,Yusif Şərifzadə

İsrail ordusu Livanın cənubunda yerləşən Təbnit bölgəsi yaxınlığında pilotsuz uçuş aparatı aşkarlanmasından sonra "Hizbullah" qruplaşmasının üzvlərinə hava zərbəsi endirdiyini bəyan edib.

VOA xəbər verir ki, İsrail ordusunun yaydığı açıqlamaya əsasən, hərbçilər ərazidə "Hizbullah"a məxsus pilotsuz uçuş aparatını müəyyən ediblər. Bildirilir ki, bundan sonra İsrail Hərbi Hava Qüvvələri pilotsuz uçuş aparatlarından istifadə edən və İsrail qüvvələrinin yaxınlığında gizləndiyi iddia olunan silahlı qrupun yerləşdiyi mövqelərə zərbə endirib.

İsrail ordusu bu fəaliyyətin tərəflər arasında qüvvədə olan atəşkəs razılaşmasının şərtlərinin pozulması olduğunu iddia edib. Açıqlamada əməliyyatın məhz bu səbəbdən həyata keçirildiyi vurğulanıb.

"Hizbullah" hərəkatı isə İsrail ordusunun açıqlaması ilə bağlı hələlik rəsmi münasibət bildirməyib. Məlumatlar müstəqil mənbələr tərəfindən tam təsdiqlənməyib.

İsrail və "Hizbullah" arasında atəşkəs razılaşmasına baxmayaraq, Livanın cənubunda zaman-zaman qarşılıqlı ittihamlar, pilotsuz uçuş aparatları ilə bağlı insidentlər və məhdud hərbi əməliyyatlar davam edir.