BAKI,VOA,Yusif Şərifzadə

İran Xarici İşlər Nazirliyi Böyük Britaniyanın İran İslam İnqilabı Keşikçiləri Korpusunu (SEPAH) milli təhlükəsizlik təhdidi kimi tanımaq qərarını pisləyib. Tehran bu addımı əsassız və məsuliyyətsiz adlandırıb.

VOA xəbər verir ki, İran Xarici İşlər Nazirliyinin açıqlamasında SEPAH-ın İran Silahlı Qüvvələrinin rəsmi hissəsi olduğu bildirilib.

Nazirlik Böyük Britaniyanın İran dövlətinin rəsmi qurumlarından birinə qarşı belə qərar qəbul etməklə beynəlxalq hüququ pozduğunu iddia edib.

Britaniya hökuməti isə bazar ertəsi günü SEPAH-a və onunla əlaqəli bir qrupa dəstəyi qadağan edib. Qərarın xarici dövlətlərin nəzarətində olan qurumlar vasitəsilə müşahidə və təxribat fəaliyyətlərinin qarşısını almaq məqsədi daşıdığı bildirilib.

Londonun qərarı xarici dövlətlər tərəfindən dəstəklənən fəaliyyətlərə qarşı yeni hüquqi mexanizmlər çərçivəsində qəbul edilib.

İran ABŞ və İsraillə hərbi qarşıdurma şəraitindədir. Tehran daha əvvəl bölgədə fəaliyyət göstərən müttəfiq silahlı qruplardan istifadə etməsi ilə bağlı ittihamları rədd edib.

Britaniyanın SEPAH-la bağlı qərarı London-Tehran münasibətlərində yeni gərginlik amili kimi qiymətləndirilir.