BAKI,VOA,Yusif Şərifzadə

İranın BMT-dəki daimi nümayəndəsi Amir Said İravani Hörmüz boğazı ilə bağlı Tehrana yönələn beynəlxalq tənqidlərə cavab verib.

VOA xəbər verir ki, Amir Said İravani BMT Təhlükəsizlik Şurasında çıxışı zamanı İranın Hörmüz boğazı ilə bağlı siyasətinin qanuni və beynəlxalq hüquqa uyğun olduğunu bildirib.

İran rəsmisi vurğulayıb ki, Tehran bu strateji su yolunun “düşmən fəaliyyətləri və hərbi hücumlar üçün istifadə olunmasına” icazə verə bilməz.

İravani qeyd edib ki, İran bu cür fəaliyyətləri ölkənin suverenliyi və həyati milli maraqları üçün birbaşa təhlükə hesab edir.

Onun sözlərinə görə, İranın bölgədə atdığı addımlar müdafiə xarakteri daşıyır və beynəlxalq hüququn prinsiplərinə əsaslanır.

Açıqlama ABŞ və İran arasında gərginliyin artdığı, Hörmüz boğazı ətrafında təhlükəsizlik və enerji daşımaları ilə bağlı narahatlıqların gücləndiyi bir vaxtda səsləndirilib.

Analitiklər qeyd edirlər ki, Hörmüz boğazı dünya enerji tədarükünün mühüm hissəsinin keçdiyi əsas marşrutlardan biridir və burada baş verən hər hansı eskalasiya qlobal bazarlara ciddi təsir göstərə bilər.

Ekspertlərin fikrincə, Tehran Hörmüz boğazı məsələsini yalnız təhlükəsizlik yox, həm də strateji və geosiyasi təsir aləti kimi qiymətləndirir.

Son həftələr ABŞ, İran və regional aktorlar arasında qarşılıqlı ittihamlar, hərbi fəaliyyət və sərt bəyanatlar Yaxın Şərqdə gərginliyi daha da artırıb.