BAKI,VOA, Nailə Babazadə

ABŞ Mərkəzi Komandanlığı (CENTCOM) sosial media hesabından yaydığı bəyanatda bildirib ki, İran limanlarına tətbiq edilən dəniz blokadası çərçivəsində aprelin 13-dən bu yana ümumilikdə 27 gəmiyə müdaxilə olunub.

VOA xəbər verir ki, məlumata görə, ABŞ hərbi dəniz qüvvələri həmin gəmilərə ya hərəkət istiqamətini dəyişmək, ya da geri dönərək hər hansı bir İran limanına lövbər salmaq barədə göstəriş verib.

Xatırladaq ki, bir neçə gün əvvəl — aprelin 18-də yayılmış hesabatda geri qaytarılan gəmilərin sayının 23 olduğu bildirilmişdi. Son rəqəmlər göstərir ki, ABŞ-ın Hörmüz boğazındakı nəzarəti daha da sərtləşib və blokada rejiminə tabe olmayan gəmilərə qarşı təzyiqlər artır.

Bu hərbi tədbirlər ABŞ Prezidenti Donald Trampın Pakistanda İranla aparılan danışıqların nəticəsiz qalmasından sonra verdiyi əmrlə icra olunur. Trampın qərarı ilə başladılan bu proses İranın neft ixracını və xarici ticarətini tamamilə dayandırmağı hədəfləyir. ABŞ tərəfi bəyan edib ki, Tehranla yeni və "ədalətli" bir razılaşma əldə olunana qədər heç bir gəminin İran limanlarına giriş-çıxışına icazə verilməyəcək.