BAKI,VOA,Yusif Şərifzadə

ABŞ Prezidenti Donald Tramp ölkəsinin İranla qarşıdurmada üstün mövqedə olduğunu iddia edib. O, “Truth Social” hesabında paylaşdığı son açıqlamasında İranın ciddi iqtisadi və hərbi böhranla üzləşdiyini bildirib.

VOA xəbər verir ki, Tramp paylaşımında Demokratlar Partiyasını respublikaçı seçicilərin ruhdan salınmasına yönəlmiş “saxta sorğular” yaymaqda ittiham edib.

“Radikal solçu demokratlar saxta sorğularla dəli olurlar. Onları əvvəllər görünməmiş səviyyədə yayırlar. Bunlar respublikaçıları ruhdan salmaq və onların səsverməyə getməsinə mane olmaq üçün həyata keçirilən ‘ruhdan salma əməliyyatları’dır”, – Tramp bildirib.

ABŞ Prezidenti real ictimai rəy göstəricilərinin onun tərəfdarları üçün əlverişli olduğunu iddia edərək ölkədə əhvali-ruhiyyənin yüksək səviyyədə olduğunu vurğulayıb.

“Biz hamıya, o cümlədən İrana qarşı qalib gəlirik. İran iqtisadi və hərbi baxımdan ölümcül tənəzzül içərisindədir”, – Tramp yazıb.

Tramp İranla bağlı fikirlərini təsdiqləyən konkret iqtisadi və ya hərbi göstəricilər təqdim etməyib.

ABŞ Prezidentinin açıqlaması Vaşinqtonun Tehrana qarşı iqtisadi təzyiqləri gücləndirdiyi və yeni sanksiyalar tətbiq etməyə hazırlaşdığı bir dövrə təsadüf edir.

İran rəsmiləri isə ABŞ-nin iqtisadi təzyiq siyasətinin uğursuz olacağını bildirir və ölkənin hərbi imkanlarının qorunduğunu, silah istehsalının davam etdiyini iddia edirlər.