BAKI, VOA, Nailə Babazadə

İran Xarici İşlər Nazirliyinin sözçüsü İsmayıl Bəqayi ABŞ Prezidenti Donald Trampı ünvanına sərt ittihamlar səsləndirərək onu "yalanı təkrarlamaqda" günahlandırıb.

VOA xəbər verir ki, İsmayıl Bəqayi "X" sosial media hesabı vasitəsilə etdiyi açıqlamada Donald Trampın ABŞ Konqresindəki çıxışı zamanı İran haqqında səsləndirdiyi fikirlərə münasibət bildirib. O, Trampın iddialarını kəskin tənqid edərək, bu cür bəyanatların saxta reallıq yaratmaq məqsədi daşıdığını qeyd edib.

İranlı rəsmi öz açıqlamasında nasist Almaniyasının təbliğat naziri Jozef Göbbelsin "Yalanı həqiqət kimi görünənə qədər təkrarlayın" metodunu xatırladıb:

"Bu qayda bu gün ABŞ hökuməti və onun ətrafındakı müharibə tərəfdarları, xüsusən də İsrail tərəfindən İran xalqına qarşı şər kampaniyası məqsədilə sistemli şəkildə istifadə olunur. İranın nüvə proqramı, qitələrarası ballistik raketləri və yanvar hadisələri ilə bağlı irəli sürülən iddialar böyük yalanların təkrarından başqa bir şey deyil."

Xatırladaq ki, Donald Tramp Konqresdəki çıxışında İranın Avropanı və ABŞ-ın dənizaşırı bazalarını hədəf ala biləcək raketlər hazırladığını iddia etmişdi. O, həmçinin İranın nüvə silahı əldə etməsinə icazə verməyəcəyini və ölkədəki etirazlar zamanı 32 min insanın həyatını itirdiyini irəli sürmüşdü.

Bəqayi isə bu rəqəmlərin və iddiaların heç bir əsasının olmadığını vurğulayaraq, beynəlxalq ictimaiyyəti bu növ dezenformasiyalara aldanmamağa çağırıb.