BAKI, AzerVoice, Nailə Babazadə

İran, sentyabr ayında Beynəlxalq Atom Enerjisi Agentliyi (MAQATE) ilə imzaladığı və əməkdaşlığın bərpasını nəzərdə tutan Qahirə Anlaşmasını rəsmən ləğv etdiyini açıqlayıb.

AzerVoice xəbər verir ki, İranın Xarici İşlər naziri Abbas Əraqçi, İngiltərə, Fransa, Almaniya və ABŞ-ın MAQATE İdarə Heyətinə Tehran əleyhinə qərar layihəsi təqdim etməsindən sonra bu açıqlamanı verib.

Əraqçi bildirib ki, qərar layihəsini təqdim edən ölkələr İranın yaxşı niyyətini nəzərə almadan MAQATE-nin etibarlılığına və müstəqilliyinə xələl vurublar və agentlik ilə İran arasındakı əməkdaşlıq prosesini pozublar. O, eyni zamanda, sentyabr ayında MAQATE ilə imzalanan əməkdaşlıq anlaşmasının artıq qüvvədə olmadığını vurğulayıb.

Qeyd edək ki, İran, İsrail və ABŞ-ın hücumları səbəbindən dayandırdığı nüvə nəzarətləri üçün sentyabrın 9-da Kahiredə razılaşma əldə etmişdi. Lakin BMT Təhlükəsizlik Şurasının 2231 saylı qərarında nəzərdə tutulan “snapback” mexanizminin işə salınmasından sonra Tehran anlaşmanın keçərsiz olduğunu açıqlayıb.

Eyni gündə MAQATE İdarə Heyətində İngiltərə, Fransa, Almaniya və ABŞ tərəfindən təqdim edilən və İranın hücuma məruz qalmış nüvə obyektlərinə giriş və zənginləşdirilmiş uran ehtiyatları barədə məlumat verməsini tələb edən qərar da təsdiqlənib.