BAKI,VOA,Yusif Şərifzadə

Almaniyada ictimai rəy sorğuları göstərir ki, seçicilərin əhəmiyyətli hissəsi kansler Fridrix Mertsin müdafiə xərclərinin artırılması və ölkənin yenidən silahlanması planını dəstəkləmir.

VOA xəbər verir ki, aparılan sorğulara əsasən, yenidən silahlanma və müdafiə sahəsinə iri həcmdə investisiyaların ayrılmasına qarşı çıxan siyasi qüvvələrə seçicilərin təxminən 35–40 faizi dəstək verir. Bu isə cəmiyyətin əhəmiyyətli bir hissəsinin kansler Fridrix Merts və vitse-kanslerin son günlər müdafiə siyasəti ilə bağlı səsləndirdiyi təşəbbüslərlə razı olmadığını göstərir.

Məlumata görə, Almaniya hökuməti müdafiə xərclərini əhəmiyyətli dərəcədə artırmağı, bu məqsədlə böyük həcmdə borclanmağı və ölkənin silahlı qüvvələrini Avropanın ən böyük ənənəvi ordusuna çevirməyi hədəfləyir. Plan çərçivəsində 2030-cu ilədək müdafiə sahəsinə təxminən 900 milyard ABŞ dollarına yaxın vəsait ayrılması nəzərdə tutulur.

Fridrix Merts bildirib ki, Avropa ölkələrinin NATO daxilində daha böyük məsuliyyət daşıması alyansı daha da gücləndirəcək. O, bununla ABŞ Prezidenti Donald Trampa Avropa ölkələrinin müdafiəyə daha çox vəsait ayırdığı və NATO qarşısında üzərinə düşən öhdəlikləri yerinə yetirdiyi barədə mesaj verməyə çalışıb.