BAKI,VOA,Yusif Şərifzadə
ABŞ Ali Məhkəməsi Prezident Donald Tramp administrasiyasına Ağ Evdə 400 milyon dollarlıq bal zalı layihəsinin tikintisini hələlik davam etdirməyə imkan verib. Məhkəmə tikinti işlərinin böyük hissəsini dayandıran aşağı instansiya məhkəməsinin qərarının icrasını müvəqqəti olaraq təxirə salıb.
VOA xəbər verir ki, Ali Məhkəmənin qərarı “inzibati dayandırma” xarakteri daşıyır və layihənin qanuniliyinə dair yekun qərar hesab edilmir. Bu addım hakimlərə administrasiyanın tikintinin məhkəmə prosesi davam etdiyi müddətdə aparılmasına dair müraciətini nəzərdən keçirmək üçün əlavə vaxt verir.
Ədliyyə Nazirliyi avqustun 14-də Ali Məhkəməyə təqdim etdiyi sənədlərdə layihənin milli təhlükəsizlik baxımından zəruri olduğunu bildirib. Nazirliyin hüquqşünasları Trampa qarşı sui-qəsd cəhdlərini və digər təhlükələri arqument kimi göstəriblər.
Administrasiyanın mövqeyinə görə, Ağ Evin Şərq qanadındakı layihə yalnız bal zalından ibarət deyil. Yerüstü hissə ilə yanaşı, yeraltı hərbi və təhlükəsizlik infrastrukturu da yaradılır.
Tramp layihəyə bomba sığınacaqları, tibbi obyektlər, pilotsuz uçuş aparatları və raketlərdən müdafiə sistemləri daxil olduğunu bildirib. Prezident bütün bu elementlərin vahid və mürəkkəb təhlükəsizlik kompleksi kimi layihələndirildiyini deyib.
Layihə 90 min kvadratfut, yəni təxminən 8 360 kvadratmetr sahəsi olan bal zalını nəzərdə tutur. Tramp onun “indiyədək tikilmiş ən möhtəşəm bal zalı” olacağını bildirib. Ədliyyə Nazirliyinin məlumatına görə, Şərq qanadındakı ümumi layihənin təxminən 65 faizi artıq tamamlanıb.
Mübahisə tarixi irsin qorunması ilə məşğul olan “National Trust for Historic Preservation” təşkilatının iddiasından sonra məhkəməyə çıxarılıb. Təşkilat administrasiyanın Konqresdən xüsusi razılıq almadan Ağ Evin Şərq qanadını sökdüyünü və yeni kompleksin tikintisinə başladığını bildirir.
Avqustun 7-də Kolumbiya Dairəsi üzrə ABŞ Apellyasiya Məhkəməsi 2-1 səs çoxluğu ilə federal hakim Riçard Leonun yerüstü tikintinin dayandırılması barədə qərarını qüvvədə saxlamışdı.
Apellyasiya Məhkəməsi qərarında prezidentin Ağ Evin sahibi deyil, “müvəqqəti sakini” olduğunu vurğulayaraq Konqresin razılığı olmadan binada fundamental dəyişikliklər edilməsinin mümkün olmadığını bildirib. Məhkəmə administrasiyanın milli təhlükəsizlik arqumentinin qanuni tələbləri avtomatik aradan qaldırmadığını da qeyd edib.
Aşağı instansiya məhkəməsinin qərarı layihəni tamamilə dayandırmırdı. Yeraltı tikinti işlərinin və Ağ Evin təhlükəsizliyi üçün “ciddi şəkildə zəruri” hesab edilən fəaliyyətlərin davam etdirilməsinə icazə verilirdi.
Tramp isə Apellyasiya Məhkəməsinin qərarını kəskin tənqid edərək onu siyasi motivli adlandırıb və Ali Məhkəmənin qərarı tamamilə ləğv etməli olduğunu bildirib.